پنجاب پولیس کے ایک بہادر جوان نے خاتون وکیل کو اغوا اور قتل کی کوشش کو ناکام بنادیا ہے، واقعہ کی ویڈیو بھی منظر عام پرآگئی ہے۔
تفصیلات کے مطابق اٹک کے کچہری کے علاقے میں پنجاب پولیس کے جواب نے خاتون وکیل کو اغوا کرکے لے جانے کی کوشش کرنے والے ملزم کو گرفتار کرلیا ہے۔
منظر عام پر آنے والی ویڈیو میں دیکھا جاسکتا ہے کہ پنجاب پولیس ہیڈ کانسٹیبل ظہیر عباس ایک ملزم پر گن تانے کھڑا ہے ، ملزم کے ایک ہاتھ میں پستول ہے اور وہ مسلسل پولیس کانسٹیبل کو مسلسل دھمکیاں دیتا دیکھائی دے رہا ہے۔
پولیس جوان ملزم سے بہت ہی پیشہ ورانہ انداز میں گفتگو کرتے ہوئے اسے اسلحہ پھینکنے اور خود کو پولیس کے حوالے کردینے پر قائل کرنے کی کوشش کرتا رہا مگر ملزم اپنی ضد پر اڑا رہا اور کہتا رہا کہ گاڑی میں موجود خاتون وکیل اس کی بیوی ہے وہ اسے لے جائے گا جس پر پولیس اہلکار نے کہا آپ ایسے نہیں جاسکتے۔
یہاں تک کہ ملزم گاڑی کے دوسرے طرف سے جاکر گاڑی میں موجود خاتون وکیل کو باہر نکال کر اس کی کنپٹی پر پستول رکھ دیتا ہے مگر پولیس اہلکار اسے خاتون کو اغوا اور قتل کرنے کی کوشش سے باز رکھتا ہے اور گرفتار کرلینے میں کامیاب ہوجاتا ہے۔