پاکستان کی ایک اور گلوکارہ کو ملا بڑا اعزاز،گریمی ایوارڈ جیتنے والی عروج آفتاب کے بعد پاکستانی گلوکارہ مہک علی کی تصویر کو ٹائمز اسکوائرپر آویزاں کردیا گیا، مہک علی کی تصویر ٹائمز اسکوائر کے بل بورڈ پر آڈیو اسٹریمنگ سروس اسپاٹی فائے کی’ایکوئل پاکستان‘ کے لیے ایمبیسیڈر کے طور پر آویزاں کی گئی۔
اسٹریمنگ سروس نے اس ماہ ’ایکوئل پاکستان‘ کے لیے ایمبیسیڈر کے طور پر گلوکارہ مہک علی کو بھی اسی لیے منتخب کیا کا کیونکہ اُنہوں نے ایک نعت ’صلی على نبينا‘ریلیز کی ہے،آڈیو اسٹریمنگ سروس اسپاٹی فائے نے مشہور صوفیانہ کلام، حمد و نعت اور تلاوتِ قرآن پاک پر مشتمل اپنی مخصوص کیٹیگری ’رمضان ڈیسٹینیشن‘ کو پاکستانی سامعین کے لیے اپ ڈیٹ کردیا ہے۔
مشہور اسٹریمنگ سروس کی اس مہم کا مقصد خواتین کری ایٹرز کو دنیا کے ساتھ اپنا کام شیئر کرنے کے لیے ایک پلیٹ فارم دے کر ان کی حوصلہ افزائی کرنا ہے،مہک علی نے ٹوئٹر پر اسٹریمنگ سروس اور اپنے مداحوں کا شکریہ ادا کیا، انہوں نے اپنے ٹوئٹ میں دو تصویریں شیئر بھی کیں۔
مہک علی نے ٹوئٹر پر ایک پرانی تصویرشیئر کی جس میں وہ ٹائمز اسکوائر پر کھڑی کیمرے کے لیے پوز دیتی نظر آرہی ہیں جبکہ دوسری تصویر میں ان کی ٹائمز اسکوائر بل بورڈ پر آویزاں کی گئی تصویر دیکھی جاسکتی ہے،انہوں نے یہ تصاویر شیئر کرتے ہوئے لکھا کہ نیویارک ٹائم اسکوائر پر وہی دن، وہی جگہ۔
مہک علی نے لکھا کہ میں کبھی نہیں جانتی تھی کہ میں ایک دن ٹائمز اسکوائر کے بل بورڈ پر ہوں گی،میں اتنی محبت اور حمایت کے لیے آپ سب کی مشکور ہوں، ہر چیز کے لیے،الحمدللّٰہ‘۔
اس سے قبل مہک علی نے اس بابرکت مہینے میں اسپاٹی فائے کی’ایکوئل پاکستان‘ کے لیے ایمبیسیڈر بننے کے بعد کہا تھا کہ یہ ایک اعزاز کی بات ہے کہ خاص طور پر رمضان جیسے بابرکت مہینے میں مجھے’ایکوئل پاکستان‘ کے لیے ایمبیسیڈر کے طور پر منتخب کیا گیا، یہ نہ صرف ایک خاتون کے طور پر میرے لیے ملک کی خواتین کو متاثر کرنے کا موقع ہے بلکہ سامعین کو اس مقدس مہینے کے لیے ایک خوبصورت کلام فراہم کرنا ہے‘۔