کاروباری ہفتے کے تیسرے روز اسٹاک مارکیٹ میں تیزی ریکارڈ کی گئی جبکہ انٹربینک میں ڈالر کے مقابلے میں روپے کی قدر میں معمولی اضافہ دیکھا گیا ہے۔
تفصیلات کے مطابق کراچی اسٹاک مارکیٹ میں آج کاروبار کے دوران زبردست تیزی دیکھی گئی جس سے سرمایہ کاروں کو اربوں روپے کا فائدہ پہنچا ہے، اعدادوشمار کے مطابق آج کراچی اسٹاک مارکیٹ میں صفراعشاریہ97 فیصد بہتری دیکھی گئی۔
کاروبار کے دوران ایک موقع پر انڈیکس46ہزار139 کی سطح تک گیا اور ایک موقع پر45ہزار674 تک گر گیا تاہم اتار چڑھاؤ کے بعد جب کاروبار بند ہوا تو انڈیکس444اعشاریہ65 پوائنٹس کے اضافے کے بعد 46ہزار119اعشاریہ 15 پوائنٹس کی سطح پر تھا۔
دوسری جانب آج انٹربینک میں ڈالر کے مقابلے میں روپے کی قدر میں معمولی اضافہ دیکھا گیا ہے۔
مائیکروبلاگنگ ویب سائٹ ٹویٹر پر اسٹیٹ بینک کی جانب سے جاری کردہ اعداوشمار کے مطابق آج انٹر بینک میں کاروبار کے دوران امریکی ڈالر مزید2 پیسے سستا ہوگیا ہے ۔
اسٹیٹ بینک کے مطابق گزشتہ روز 176روپے43 پیسے میں فروخت ہونےو الا امریکی ڈالر آج کی کمی کے بعد 176روپے41 پیسے کا ہوگیا ہے۔
