پاکستان سپر لیگ کے ساتویں سیزن کا جادو اس وقت پورے پاکستان سمیت پوری دنیا کے سر پر چڑھ چکا ہے، اس کا ثبوت شائقین کی بڑھتی ہوئی تعداد سے لگایا جاسکتا ہے جس میں اب امریکی سفارتی عملہ بھی شامل ہوچکا ہے۔
تفصیلات کے مطابق آج پی ایس ایل میں لاہور قلندرز اور اسلام آباد یونائیٹڈ کے میچ کے دوران امریکہ کے لاہور میں قونصل جنرل نہ صرف قذافی اسٹیڈیم لاہور میں میچ دیکھنے پہنچے بلکہ انہوں نے اسلام آباد میں اپنے سفارتی عملے کو ایک بڑا چیلنج بھی کردیا۔
مائیکروبلاگنگ ویب سائٹ ٹویٹر پر میچ سے قبل امریکی قونصل جنرل لاہور کے آفیشل ہینڈل سے جاری پیغام میں ولیم میکینوئل کی لاہور قلندرز کی یونیفارم میں تصاویر شیئر کی گئیں اور کہا گیا کہ آج قلندرز کا یونائیٹڈ کے ساتھ میچ ہے جس میں قونصل جنرل لاہور کی ٹیم کی سپورٹ کریں گے۔
ٹویٹ میں اسلام آباد میں امریکی سفارت خانے کے آفیشل ٹویٹر ہینڈل کو ٹیگ کرتے ہوئے کہا گیا کہ آپ کیلئے ایک چیلنج ہے ، کیا آپ کو لگتا ہے کہ آپ کی ٹیم لاہور قلندرز کی بہترین ٹیم کو شکست دے سکے گی؟
امریکی قونصل جنرل نے اسلام آباد میں اپنے سفارت خانے کو چیلنج کرتے ہوئے کہا تھا کہ آج کے میچ میں لاہور قلندرز کی جانب سے جب بھی باؤنڈری لگائی جائے گی وہ اسٹیڈیم میں پش اپس کریں گے۔
پاکستان کرکٹ بورڈ کے چیئرمین رمیز راجہ نے میچ کے دوران کی ان کی ایک ویڈیو بھی شیئر کی جس میں ولیم میکنوئل فخر زمان کی جانب سے ایک زوردار چھکے پر اپنے ساتھیوں کے ساتھ خوشی مناتے اور پش اپس لگاتے دکھائی دے رہے ہیں۔
واضح رہے کہ اس میچ میں لاہور قلندر نے اسلام آباد یونائیٹڈ کو شکست دے دی ہے۔
