پاکستان تحریک انصاف نے الیکشن کمیشن کی جانب سے ملک بھر میں ضمنی انتخابات کو ملتوی کرنے کے فیصلے کو چیلنج کرنے کا فیصلہ کرلیا، اس حوالے سے رہنما تحریک انصاف شاہ محمود قریشی کا ماہر قانون بابر اعوان سے ٹیلی فونک رابطہ ہوا،جس میں الیکشن کمیشن کے فیصلے کو چیلنج کرنے سے متعلق گفتگو ہوئی۔
بابر اعوان نے کہا کہ ملتان میں کوئی ایمرجنسی نہیں اور نہ ہی آفت زدہ قرار دیا ہے، عمران خان کے خلاف ابھی فرد جرم عائد نہیں ہوئی ہے، 22 ستمبر کو فرد جرم عائد کی جائے گی،میرا مؤقف وہی ہے جو آج عدالتی معاونین نے مؤقف اپنایا ہے، دنیا میں توہین عدالت کا قانون ختم ہو چکا ہے، عمران خان کے خلاف 21 سے زائد مقدے درج کیے جا چکے ہیں۔
چیف الیکشن کمشنر سلطان سکندر راجا کی زیرِ صدارت ضمنی انتخابات کے انعقاد سے متعلق جائزہ اجلاس منعقد ہوا جس میں الیکشن کے لیے صورتِ حال کا جائزہ لیا گیا،اجلاس میں فیصلہ کیا گیا کہ 11ستمبر، 25 ستمبر اور 2 اکتوبر کو ہونے والے ضمنی الیکشن ملتوی کیے جا رہے ہیں جبکہ آئندہ تاریخ کا اعلان بعد میں کیا جائے گا، انتخابات بارشوں اور سیلابی صورتِ حال کے باعث ملتوی کیے گئے تھے۔
دوسری جانب ضمنی انتخابات میں ضابطہ اخلاق کی خلاف ورزی پر خیبرپختونخوا الیکشن کمیشن نے عمران خان کو آج ذاتی حیثیت میں طلب کررکھا ہے، نوٹس میں کہا کہ چھ ستمبر کو پشاور جلسے کیلیے سرکاری وسائل کا استعمال کیا گیا۔
