اسلام آباد میں پراسرار ہلاکت کے کیس میں ایس پی اسلام آباد عارف شاہ سمیت تین پولیس افسران کو گرفتار کرلیا گیا ہے۔
خبررساں ادارے کی رپورٹ کے مطابق اسلام آباد کی ایڈیشنل سیشن کورٹ میں خاتون پولیس اہلکار کی ہلاکت سے متعلق کیس کی سماعت ہوئی، دوران سماعت ایڈیشنل سیشن جج ظفر اقبال سپرا نے ایس پی اسلام آباد عارف شاہ، کانسٹیبل محمد علی اور کانسٹیبل افتخار کی ضمانت میں توسیع کی درخواست مسترد کردی جس کے بعد پولیس نے تینوں ملزمان کو گرفتار کرلیا ہے۔
واضح رہے کہ پولیس کانسٹیبل اقراء نذیر کے والدین کے انکار کے بعد پولیس کی مدعیت میں اسلام آباد کے تھانہ آبپارہ میں نامعلوم ملزمان کے خلاف مقدمہ درج کیا گیا تھا۔
علاوہ ازیں آئی جی اسلام آباد کی جانب سے بنائی گئی چار رکنی کمیٹی نے ابتدائی تحقیقات کے بعد ایس پی اسلام آباد عارف شاہ کی معطلی کی سفارش کی تھی، تحقیقاتی رپورٹ میں انکشاف کیا گیا کہ اقراء نذیر کا عارف شاہ کے گھر تواتر آنا جانا تھا اور عارف شاہ کے گھر والوں سے بھی میل جول تھا، موت کےروز جب اقراء نذیر واپس آئیں اس وقت عارف شاہ اپنے گھر میں اکیلے تھا، شبہ ہے کہ اقراء کو کوئی نشہ آور چیز کھلائی گئی تھی۔