کرونا سال ٢٠٢٠ حکاتئیں اور شکایتیں

[Muhammad Arif Ansari]

سال ٢٠٢٠ کا طبل آمد بھی خوب بجا . ایسا بجا کے دنیا کے بینڈ باجے بجا دیے. اب تو اگر کوئی قریب میں کھانس بھی دے تو دماغ میں خوف سے گھنٹیاں بجنی شروع ہوجاتی ہیں. اور اگر چھینک دے تو پھر دانت بھی بجنے لگتے ہیں. انسان جو آج سے کچھ مہینوں پہلے آس پاس کی دنیا سے بیخبر اپنی دنیا میں مگن تھا. کرونا نے آکے اس کو باقاعدہ ایسا عملی جامہ پہنایا کے لوگ روز کا پہناوا بھول گئے. اب آپ کچھ کرو یا نا کرو. لیکن کرونا سے باخبر ضرور رہو. ویسے بھی آجکل دنیا جس دور سے گزر رہی ہے اسکو آپ بغیر کچھ نا کرے ہوۓ بھی کرونا کا دور تو کہہ ہی سکتے ہیں. اس دور کو نا تو کوہ قاف سے تشبیع دی جاسکتی ہے اور نہ ہی پرستان کی دنیا سے. البتہ اس دنیا کو اگر اس عذاب سے بچانا ہے تو پھر اس کی ویکسین کے لئے کوہ قاف تو کیا انٹارکٹکا بھی جانا پڑے تو جائینگے. آج کے دور میں دنیا ایک ایسے دور میں داخل ہو چکی ہے جسکی ساری رعایا بشمول شہزادے ایک ایسے مرض کی لپیٹ میں جسمیں واپسی کے باوجود بھی واپسی کی کوئی گارنٹی نظر نہیں آرہی.

البتہ دنیا بھر میں غیر علانیہ منادی کرادی گئی ہیکہ جو کوئی بھی اسکی ویکسین ڈھونڈ کر یا دریافت کریگا اسکو دولت سے مالا مال کردیا جایگا. اسکے بعد سے ایسی بھاگ دوڑ شروع ہوچکی ہیکہ سارے سائنسدان بشمول ڈاکٹر اور ساری فارمسٹیکل کمپنیاں اسکے توڑ میں ایک دوسرے سے سبقت لیجانے میں لگی ہوئی ہیں تاکہ انسانیت کی خدمت کے ساتھ ساتھ مال غنیمت بھی ہاتھ آجائے. اور نوبل پرائز جو رکھے رکھے خراب ہورہا ہے اسکے لئے بھی دل قلاٹیاں مار رہا ہے. اس بھاگ دوڑ میں عوام کی بھی ایک کثیر تعداد کسی سے پیچھے رہنا نہیں چاہتی وہ بھی ایک بڑی قوت کے ساتھ کرونا کے میدان میں ہر اول دستہ بنی ہوئی ہے کہیں کہیں تو اتنی بڑی تعداد کے نیم حکیم بلاے جان بنی ہوئی ہے. اپنے ٹوٹکوں اور نسخوں کی وہ مسلا دھار بارش کی ہوئی ہیکہ سوشل میڈیا پر تو سیلاب کی سی کیفیت ہے. ان ٹوٹکوں اور نسخوں کی نا تھمنے والی بارش کے یہ نسخہ پکڑو تو وہ ٹوٹکا ہاتھ سے سلپ اور وہ ٹوٹکا پکڑو تو ہاتھ میں آیا ہوا یہ نسخہ بمعہ ترکیب ہاتھ سے سلپ ہونے کا خطرہ . ان سب نسخوں اور ٹوٹکوں کے باوجود مرض ہیکہ چھری کے نیچے آنے کو تیار ہی نہیں ہے. بلکہ بقول شاعر مرض بڑھتا گیا جوں جوں دوا کی.

کچھ اسطرح کا معامله یا گھمبیر ہوتی ہوئی صورتحال آجکل ہسپتالوں میں بڑھتے ہوۓ مریضوں کی ہیکہ بڑھتے گئے مریض جوں جوں نسخے استعمال کئے. آجکل آپ جسے ہی وہاٹس ایپ یا فیس بک کھولیں تو درجنوں کے حساب سے یہ ٹوٹکے نوٹنکیاں کرتے ہوۓ نظر آئیںگے کبھی ایک نے چھلانگ ماری تو دوسرا اپر اور جو دوسرے نے ماری تو تیسرا پھودک کے حاضر خدمت. خدمتوں کا یہ سلسلہ صبح سے جو شروع ہوتا ہے وہ رات تک بلا شرکت غیر جاری رہتا ہے. اب اسکی دو ہی وجہیں ہو سکتی ہیں یا تو اپنے نسخوں کی مارکیٹ کرنا یا پھر ہم سب پر تجربہ کرنا اگر ٹھیک ہوگئے تو واہ واہ بصورت دیگر سب کی باجماعت واٹ لگانا.

اسوقت تک اتنے سارے ٹوٹکے اور نسخے فون میں محفوظ ہوچکے ہیں کے فنون لطیفہ کے لئے فون میں جگہ کم پڑ رہی ہے. کمبخت یہ ٢ جی بی کی میموری تو کھا ہی چکا ہے . اور حفظ ما تقدم کے طور پر مزید تین جی بی میموری کھانے کی خواہش دل میں لئے بیٹھا ہے. بقول لال چند کے کرونا کے ہتھوڑے ہمارے عصابوں پر تو مسلسل برس ہی رہے ہیں کے اس پے طرہ یہ کے اب ماہر نفسیات بھی اپنے کس بل کھول رہے ہیں کے میدان کا یوں خالی رہنا فلسفہ نفسیات کی سرا سر نفی ہوگی. ذہنی تناؤ سے آئے ہوۓ اس بوجھ کو اور عصابوں پر چھائے اس بوجھ کو ہلکا کرنے کے لئے انکی بھی مقناطیسی نظریں اپنے حصہ بجز جصہ پر ہیں..

از قلم
محمد عارف انصاری