پاکستان تحریک انصاف نے قومی اسمبلی میں مشروط واپسی کا اشارہ دے دیا،لاہور میں میڈیا سے گفتگو میں رہنما تحریک انصاف فواد چوہدری نے کہا کہ الیکشن کی تاریخ کااعلان ہو تو تحریک انصاف کا اسمبلی واپس جانا ممکن ہے۔
فواد چوہدری نے کہا کہ حکومت الیکشن کی تاریخ دے تو الیکشن فریم ورک کے لیے ایوان میں جا کربات کرنےکو تیار ہیں،انتخابی اصلاحات کا بل ابھی تک مؤخر ہے، اس پر بات چیت ہوسکتی ہے۔
فواد چوہدری نے کہاکہ راجہ ریاض کے نامزد کردہ الیکشن کمیشن کے تحت تو انتخابات نہیں کروائے جاسکتے، الیکشن کمیشن کو ایک آزاد الیکشن کمیشن کی حیثیت میں واپس لانا ہے۔
رہنما پی ٹی آئی نے کہا کہ تمام چیزوں پربات چیت اور سیاسی جماعتوں کے مابین باہمی رابطہ ضروری ہے،وزیراعظم اسمبلی تحلیل ہونےکی تاریخ کا اعلان کریں توباقی سب کچھ ممکن ہے۔
دوسری جانب پاکستان تحریکِ انصاف کے چیئرمین عمران خان اس موقف پر ڈٹے ہوئے ہیں کہ ان کی جماعت کے قومی اسمبلی میں واپسی کے امکانات نہیں لیکن پھر بھی سیاسی حلقوں میں یہ سوال ہے کہ وہ قومی اسمبلی میں واپس جائیں گے یا نہیں۔
