متحدہ عرب امارات حکو مت نے 21 سال سے زائد عمر کے افراد کیلئے بنائی جانے والی فلموں کی سینسر شپ ختم کردی ہے جس کے بعد اب ان فلموں کو بغیر کسی کانٹ چھانٹ کے سینما گھروں میں دکھایا جائے گا۔
برطانوی نشریاتی ادارے بی بی سی کی رپورٹ کے مطابق یو اے ای حکومت نے سکریننگ اور سینسر شپ ختم کرتے ہوئے21 پلس ریٹنگ پالیسی متعارف کروائی ہے جس کے تحت اب یو اے ای کے سینما گھروں میں 21 سال سے زائد عمر کے افراد فلموں کا انٹرنیشل ورژن دیکھ سکیں گے جس میں کسی بھی قسم کا کوئی سین سینسر نہیں ہوا ہوگا۔
یواے ای میں ثقافت اور یوتھ میڈیا ریگولیٹری آفس نے اس حوالے سے ایک بیان جاری کیا جس میں کہا گیا ہے کہ 21 سال کی عمر کی حد پر سختی سے عمل درآمد کیا جائے گا اور سینما گھر فلم بینوں کی عمر کی مکمل تصدیق کے بعد ہی مخصوص فلموں میں داخلے کی اجازت دیں گے۔
واضح رہے کہ اس سے قبل بین الاقوامی فلموں کو یو اے ای میں نشر کرنے سے قبل اس میں سے نامناسب اور بالغ افراد سے متعلق سینز کو سینسر کردیا جاتا تھا اور فلم ان سینز کے بغیر سینما گھروں میں ریلیز کی جاتی تھی ۔