برطانوی صحافی جارج ڈوبیل نے انگلش کرکٹ بورڈ کی جانب سے دورہ پاکستانی منسوخی کے فیصلے کو تنقید کا نشانہ بنایا ہے۔
خبررساں ادارے کی رپورٹ کے مطابق برطانوی صحافی نے انگلش کرکٹ بورڈ کے اس فیصلے کو تنقید کا نشانہ بناتے ہوئے کہا ہے کہ ایسے دہرے معیار کے فیصلوں کے باعث انگلش کرکٹ بورڈ دوستوں سے محروم ہوجائے گا، ای سی بی کے ایسے فیصلوں اور دہرے رویے کے باعث قوموں کے درمیان فاصلے بڑھ رہے ہیں۔
جارج ڈوبیل نے انگلش کرکٹ بورڈ کے دہرے معیار کو بے نقاب بھی کیا اور کہا کہ آئی سی سی چیمپئنز ٹرافی سے قبل لندن میں ایک دہشت گردی کا واقعہ ہوتا ہے، نیوزی لینڈ کی ویمن کرکٹ ٹیم کو برطانیہ میں دھمکیاں ملتی ہیں مگر ان دھمکیوں کو رد کردیا جاتا ہے، دہشت گردی کے واقعے کے باوجود برطانیہ میں میچز منعقد ہوتے ہیں۔
جارج ڈوبیل نے مزید کہا کہ برطانیہ میں میچز کے دوران شائقین گراؤنڈ میں آگئے، اگر ایسے واقعات کسی اور ملک میں ہوتے ہوئے انگلینڈ کرکٹ بوڈ کا کیا ردعمل ہوتا؟
برطانوی صحافی نے مزید کہا کہ دورہ پاکستان کے حوالے سے برطانوی دفتر خارجہ نے ٹریول ایڈوائس بھی بدلی،سیکیورٹی مشیر نے بھی کوئی پیغام نہیں دیا، پاکستان میں برطانوی سفارتخانہ بھی مطمئن تھا مگر اس سب کے باوجود دورہ پاکستان منسوخ کردیا گیا ۔
واضح رہے کہ نیوزی لینڈ کرکٹ بورڈ کی جانب سے پاکستانی میں میچ سے کچھ دیر قبل دورے کو منسوخ کرنے کا اعلان کرکے ٹیم کو واپس بلوالیا تھا، بعد ازاں انگلینڈ کرکٹ بورڈ نے بھی شیڈولڈ دورہ پاکستان کو منسوخ کرنے کا اعلان کردیا ۔