قومی کرکٹ ٹیم کے سابق کپتان آل راؤنڈر محمد حفیظ نے انگلینڈ کرکٹ بورڈ کی جانب سے دورہ منسوخی پر ردعمل دیتے ہوئے کہا ہے کہ چیمپئنز ٹرافی میں ریڈ الرٹ کے باوجود برطانیہ گئے اوروہاں کھیلے۔
نجی ٹی وی چینل کے پروگرام میں انگلینڈ کرکٹ بورڈ کی جانب سے پاکستان کے ساتھ سیریز کو منسوخ کرنے سے متعلق فیصلے پر ردعمل دیتے ہوئے کہا کہ پاکستان کرکٹ ٹیم نے بہت سے ایسے ممالک کے دورے کیے جہاں دیکھنے یا سننے میں حالات بہت بہتر نہیں تھے مگر بطور پاکستانی ہم بڑے دل کا مظاہرہ کرتے اور ایسی جگہوں پر جاکر کرکٹ کھیلتے رہے ہیں۔
محمد حفیظ نے کہا کہ ہم نے پاکستان میں کرکٹ کی واپسی کیلئے سخت ترین حالات کا سامنا کیا ہے، ہم نے برطانیہ میں چیمپئنز ٹرافی سے پہلے دہشت گردی کے واقعے، ریڈ الرٹ کے باوجود دورہ منسوخ نہیں کیا اور وہاں گئے۔
قومی آل راؤنڈر نے کہا کہ نیوزی لینڈ میں مشکل ترین حالات میں جاکر کھیلے، 14 دن کا قرنطینہ اور تمام تکالیف برداشت کیں، نیوزی لینڈ اور برطانیہ کی جانب سے پاکستان کا دورہ منسوخ کرنا تکلیف دہ اقدام ہے۔
محمد حفیظ نے پاکستان کی سیکیورٹی صورتحال کے بارے میں بات کرتے ہوئے کہا پوری دنیا جانتی ہے پاکستان کی انٹیلی جنس ایجنسی دنیا کی بہترین ایجنسیوں میں سے ایک ہے، جن
الزامات کو عائد کرکے دورے منسوخ کیے گئے وہ ہمارے اورپاکستانی شائقین کیلئے انتہائی تکلیف دہ ہیں۔
