انگلینڈ کے سابق کرکٹ کپتان مائیکل وان نے کہا ہے کہ دیکھتے ہیں اب آئی پی ایل مانچسٹر ٹیسٹ کی طرح منسوخ ہوتی ہے یا نہیں۔
آئی پی ایل میں ایک کھلاڑی کا کورونا ٹیسٹ مثبت آیا ہے جس پر ردعمل دیتے ہوئے مائیکل وان کا کہنا تھا کہ گارنٹی دیتا ہوں کہ مانچسٹر ٹیسٹ جس طرح منسوخ ہوا اس طرح آئی پی ایل منسوخ نہیں ہوگی۔
اس سے 2 روز قبل مائیکل وان نے ٹویٹ کیا تھا کہ سکیورٹی ایشوزکےباعث دورہ منسوخ کرنےکا جوازسمجھ میں آتا ہے لیکن میں حیران ہوں کہ کیا سیریز متحدہ عرب امارت(یواے ای) میں نہیں ہوسکتی تھی؟
مائیکل وان نے یہ تجویز بھی دی تھی کہ سیریز کو منسوخ نہ کیا جائے بلکہ سیریز کو پاکستان کے بجائےیو اے ای منتقل کردیا جائے جس پر پاکستان کی طرف سے سخت ردعمل آیا اور پاکستان نے واضح کردیا کہ ہوم سیریز کسی نیوٹرل مقام پر منتقل نہیں کی جائے گی۔
یاد رہے کہ سن رائزرز حیدرآباد کے بولر ناترجن کا کورونا ٹیسٹ مثبت آیا ہے۔ ساتھ ہی بی سی سی آئی نے تصدیق کی کہ کھیل جاری رہے گا۔ کرکٹ کی خبریں دینے والے ایک غیر ملکی ادارے نے بھی کہا کہ ناترجن نے کوویڈ19 مثبت آنے پر خود کو قرنطینہ کر لیا ہے۔ جب کہ شیڈولڈ میچ لازمی ہو گا۔
واضح رہے کہ گزشتہ دنوں انگلینڈ اور بھارت کے درمیان ہونے والی ٹیسٹ سیریز میں بھارتی کوچ روی شاستری اور تین دیگر سپورٹ اسٹاف ممبران کے کورونا ٹیسٹ مثبت آنے پر بھارت اور انگلینڈ کا پانچواں اور آخری ٹیسٹ میچ منسوخ کر دیا گیا تھا۔