ویسٹ انڈیز کیخلاف ڈراپ کیے جانے پر سرفراز افسردہ ۔ پہلے ٹویٹ کیا اور پھر ٹویٹ ڈیلیٹ کردیا
قومی ٹیم کے سابق کپتان سرفراز احمد کو ویسٹ انڈیز کے خلاف سیریز سے ڈراپ کردیا گیا، جس پر سرفراز احمد کا دل ٹوٹ گیا ۔
اس بات کا اظہارانہوں نے ٹوئٹر پر کیا ہے،سابق کپتان نے ٹوئٹر پر شاعرانہ انداز میں لکھا کہ میری خامیوں کا تذکرہ اس طرح۔۔ لوگ اپنے اعمال میں فرشتہ ہوں جیسے۔
سرفراز احمد نے ویسٹ انڈیز کے خلاف ڈراپ کیے جانے پر سماجی رابطے کی ویب سائٹ ٹویٹر پر ردعمل دیا اور تھوڑی دیر بعد ٹویٹ ڈیلیٹ بھی کردیا،سرفراز کے ڈیلیٹ کیے گئے ٹویٹ کا اسکرین شاٹ سوشل میڈیا پر وائرل ہوگیا۔
پاکستان اور ویسٹ انڈیز کے درمیان ون ڈے اور ٹی 20 سیریز 13 سے 22 دسمبر کے درمیان کھیلی جائے گی،سرفراز احمد کو ون ڈے اور ٹی 20 دونوں اسکواڈ میں شامل نہیں کیا گیا، سرفراز احمد کو بنگلہ دیش کے خلاف ٹی 20 سیریز کے آخری میچ میں موقع دیا گیا تھا لیکن وہ 12 گیندوں پر 6 رنز بنا کر پویلین لوٹ گئے تھے۔
