وفاقی تحقیقاتی ایجنسی(ایف آئی اے) نے کرپٹو کرنسی سے متعلق کیس کی سماعت کے دوران عدالت میں بیان دیا کہ وقار ذکاء ہمیں ہراساں کررہا ہے۔
تفصیلات کے مطابق سندھ ہائی کورٹ میں جسٹس محمد کلہواڑ کی سرابراہی میں 2 رکنی بینچ نے کرپٹو کرنسی سے متعلق کیس کی سماعت کی، سماعت کے دوران ایف آئی اے حکام نے میزبان اور سوشل میڈیا اسٹار وقار ذکاء کے خلاف انکوائری سے متعلق تحریری جواب عدالت میں پیش کیا۔
ایف آئی اے نے اپنے تحریری جواب موقف اپنایا کہ وقار ذکاء ایف آئی اے کو ہراساں کرنے کیلئے مسلسل سوشل میڈیا پر ویڈیوز اپلوڈ کررہے ہیں۔عدالت نے ایف آئی اے کے بیان پر حیرانگی کا اظہار کرتے ہوئے کہا کہ وقار ذکاء ایف آئی اے جیسے ادارے کو کیسے ہراساں کرسکتا ہے؟
ایف آئی اے نے عدالت کو بتایا کہ وقار ذکاء وزیراعظم، اسٹیٹ بینک اور ایف آئی اے کے خلاف ویڈیو بنا کر اپلوڈ کررہے ہیں جن میں وہ توہین آمیز مواد شیئر کرتے ہیں۔سماعت میں وقارذکاء کے وکیل مولوی اقبال حیدر نے موقف اپنایا کہ ایف آئی اے وقار ذکاء کو ہراساں کررہی ہے، ان کے گھر پر چھاپے مارے جارہے ہیں ، وقار ذکاء اور ان کے والد کے بینک اکاؤنٹس منجمد کردیئے گئےہیں۔
انہوں نے عدالت کو یقین دہانی کروائی کہ وقارذکاء اب کسی بھی شخصیت یا ادارے کے خلاف سوشل میڈیا پر کوئی مواد اپلوڈ نہیں کریں گے جس کے بعد عدالت نے وقار ذکاء کو ہراساں نہ کرنے کے حکم امتناع میں توسیع کرتے ہوئے سماعت 17 فروری تک ملتوی کردی ہے۔A
