مسلم لیگ ن کے صدر شہباز شریف اور ان کے اہلخانہ کے ملازمین کے بینک اکاؤنٹس میں اربوں روپے جمع ہونے سے متعلق تفصیلات سامنے آگئی ہیں۔
تفصیلات کے مطابق تحریک انصاف کی پارلیمانی سیکرٹری عالیہ حمزہ نے قومی اسمبلی کی پبلک اکاؤنٹس کمیٹی(پی اے سی) کو بذریعہ خط شہباز شریف اور ان کے اہلخانہ کے ملازمین کے ناموں پر کھولے گئے بینک اکاؤنٹس کی تفصیلات پیش کردی ہیں۔
خبررساں ادارے کی رپورٹ کے مطابق عالیہ حمزہ نے اپنے خط میں شہباز شریف فیملی کے چپڑاسی مقصود کے بینک اکاؤنٹ کی تفصیلات پیش کیں جن کی تنخواہ محض 25 ہزار ماہانہ ہے مگران کے اکاؤنٹ میں 3ارب 75 کروڑ روپے موجود ہیں۔
عالیہ حمزہ کے خط میں شہباز شریف فیملی کے چپڑاسی گلزار سے متعلق انکشاف کیا گیا کہ 12 ہزار روپے ماہانہ لینے والے اس ملازم کے اکاؤنٹ میں 1ارب 25 کروڑ، 10 ہزار ماہانہ پر کام کرنے والے کیشیئر کے اکاؤنٹ میں 1ارب 75 کروڑ،ساڑھے 10 ہزار روپے پر کام کرنے والے اسٹور کیپر کے بینک اکاؤنٹ میں ڈیڑھ ارب روپے موجود ہیں۔
رہنما تحریک انصاف نے اپنے خط میں پبلک اکاؤنٹس کمیٹی کو بتایا کہ شہباز فیملی کے کلرک اظہر عباس کے اکاؤنٹ میں ڈیڑھ ارب روپے ہیں جبکہ ان کی تنخواہ صرف ساڑھے 9 ہزار روپے ہے، ساڑھے 21 ہزار پر کام کرنےوالے اسسٹنٹ خضر حیات کے اکاؤنٹ میں تقریبا ڈیڑھ ارب، کلرک اقرار حسین کے اکاؤنٹ میں ایک ارب روپے موجود ہیں۔
عالیہ حمزہ نے اس کے علاوہ بھی متعدد ملازمین کی آمدن اور بینک اکاؤنٹس میں موجود رقوم کی تفصیلات پی اے سی کے سامنے پیش کی اور کہا کہ ایک کرپٹ انسان قومی اسمبلی میں اپوزیشن لیڈر نہیں ہوسکتا، پبلک اکاؤنٹس کمیٹی شہباز شریف کا احتساب کرے۔