بلوچستان نیشنل پارٹی(بی این پی) مینگل کے سربراہ اخترمینگل نے سابق وزیراعلی بلوچستان جام کمال پر طنز کے تیر برساتے ہوئے کہا کہ جام کمال وزارت اعلی کھونے کے غم میں عمران خان سے بھی آگے نکل چکے ہیں۔
تفصیلات کے مطابق سابق وزیراعلی بلوچستان اختر مینگل کی جانب سے جاری کردہ ایک بیان میں کہا گیا ہے کہ جام کمال وزارت اعلی کی چمک کی وجہ سے بلوچستان کھینچے چلے آتے ہیں، ان کا ایک ہی مقصد ہے اور وہ صرف اقتدار کا حصول ہے۔
اختر مینگل نے کہا کہ گزشتہ ساڑھے تین سالوں میں بلوچستان کے عوام کے ساتھ جو کھلواڑ ہوتا رہا اس سے سب بخوبی واقف ہیں، عمران خان کے پاس تو سیاسی قوت ہے جس کا وہ مظاہرہ کرتے ہیں جام کمال کے پاس سوائے جھوٹ کے اور کچھ بھی نہیں ہے، انہیں بلوچستان جتنا دکھ ہے ہم سب جانتے ہیں۔
پی ڈی ایم رہنما نے مزید کہا کہ بلوچستان میں تبدیلی کے حوالے سے جام کمال سے کوئی معاہدہ نہیں ہوا، اگر عدم اعتماد کی تحریک کے معاملے پر ہمیں اعتماد میں لیا جاتا تو ہم ضرور ان سے بات کرتے، انہیں جب ہر طرف سے سرخ جھنڈی دکھائی دی تو انہیں ہماری یاد آگئی۔
واضح رہے کہ گزشتہ روز وزیراعلیٰ بلوچستان عبدالقدوس بزنجو کے خلاف تحریک عدم اعتماد ناکام ہوگئی تھی جس پر جام کمال نے الزام لگایا تھا کہ پی ڈی ایم نے انکے ساتھ ہاتھ کیا ہے۔
امکان ظاہر کیا جارہا ہے کہ بلوچستان عوامی پارٹی شہباز شریف حکومت کو دی گئی اپنی حمایت واپس لے لے گی جس سے شہبازحکومت سنگین مشکلات سے دوچار ہوسکتی ہے۔