سابق وزیراعظم عمران خان نے ایک بار پھر ملک میں جلد انتخابات کے انعقاد کامطالبہ دہراتے ہوئے کہا ہے کہ اس سے پہلے کہ سری لنکا کے راستے پرچلیں ہمیں ملک میں فوری طور پر آزادانہ اور منصفانہ انتخاب کا اعلان کرنا ہوگا۔
مائیکروبلاگنگ ویب سائٹ ٹویٹر پر سابق وزیراعظم عمران خان نے گزشتہ روز کے اسلام آباد جلسے کی جھلکیوں پر مشتمل ایک ویڈیو شیئر کی جس میں گزشتہ روز کے پریڈ گراؤنڈ میں جلسے کے مناظر موجود تھے۔
عمران خان نے اپنے پیغام میں امپورٹڈ حکومت اور اس کے پیچھے کے کرداروں کو واضح پیغام دیتے ہوئےکہا کہ مکمل افراتفری سے نکلنے کا واحد راستہ فوری طور پر آزادانہ اور منصفانہ انتخابات کا اعلان اور انعقاد ہے۔
انہوں نے مزید کہا کہ بدمعاشوں کا یہ ٹولہ ایک طرف جس طرح عوام کو ناقابل برداشت مہنگائی میں کچل رہا ہے وہیں دوسری طرف ان کی منی لانڈرنگ کے ذریعے اورکرپشن کی دولت کے 1100 ارب روپے چوری کر رہا ہے۔
سابق وزیراعظم عمران خان نے خبردار کرتے ہوئےکہا کہ یہ صرف وقت کی بات ہے اس سے پہلے کہ ہم سری لنکا کے راستے پر چلیں اور مکمل معاشی اور سیاسی پستی میں گرجائیں ہمیں ملک میں فوری طور عام انتخابات کا اعلان کروانے چاہیے۔