انگلینڈ کےساتھ ٹیسٹ سیریز سے قبل پریس کانفرنس سے خطاب کرتے ہوئے پاکستانی فاسٹ باؤلر نسیم شاہ نے ایک صحافی کے انگریزی میں پوچھے سوال پر ایسا دلچسپ جواب دیا کہ تمام صحافیوں نے قہقے لگادیئے۔
تفصیلات کے مطابق راولپنڈی کرکٹ اسٹیڈیم میں پاکستان اور انگلینڈ کی ٹیموں کے فاسٹ باؤلرز کی جانب سے پریس کانفرنس کی گئی، اس موقع پر پاکستان کی جانب سے نسیم شاہ جبکہ انگلینڈ کے جیمز اینڈرسن نے صحافیوں کے سوالوں کے جواب دیے۔
اس موقع پر نسیم شاہ سے جب مقامی صحافیوں نے سوالات پوچھے تو انہوں نے بہت پرسکون انداز میں تمام سوالوں کے جوابات دیئے، تاہم اسی دوران ایک غیر ملکی صحافی نے نسیم شاہ سے سوال کیا جس پر ہمیشہ خوشگوار موڈ میں رہنے والے نسیم شاہ نے مسکراتے ہوئے جواب دیا۔
اسی صحافی نے پہلے سوال کا جواب ملتے ہی دوسرا سوال داغ دیا جس پر نسیم شاہ نے دلچسپ جملہ کہا جسے سن کر پورے ہال میں قہقے گونج اٹھے، نسیم شاہ نے کہا کہ" برادر میرے پاس صرف 30 فیصد انگریزی ہے اور وہ بھی اب ختم ہوچکی ہے"۔
اس جواب پر تمام صحافیوں کی ہنسی چھوٹ گئی تاہم غیر ملکی صحافی نے اپنے سوال کو دوبارہ دہرایا جس پر نسیم شاہ نے پراعتماد طریقے سے جواب دیا۔
غیر ملکی صحافی نے نسیم شاہ سے 40 سالہ برطانوی فاسٹ باؤلرجیمز اینڈرسن سے متعلق سوال کیا تھا جس پر نسیم شاہ کا کہنا تھا کہ وہ ایک لیجنڈ ہیں، ہم نے ان سے بہت کچھ سیکھا ہے ، بطور فاسٹ باؤلر میں جانتا ہوں کہ فاسٹ باؤلنگ کتنی مشکل ہوتی ہے۔