سابق نگراں وزیراعظم انوارالحق کاکڑ نے کہا ہے کہ ہمیشہ ملک میں گندم کی کمی کو بحران کا نام دیا جاتا تھا، پہلی بار ہے کہ گندم کی زیادتی کو بھی بحران کہا جارہا ہے۔
تفصیلات کے مطابق سابق نگراں وزیراعظم انوارالحق کاکڑ نے نجی خبررساں ادارے کو خصوصی انٹرویو دیا جس میں انہوں نے گندم اسکینڈل، انتخابات میں دھاندلی کےالزاماات، بلوچستان کی موجودہ صورتحال سمیت مختلف موضوعات پر کھل کر گفتگو کی۔
گندم بحران سے متعلق الزام تراشیوں کے جواب میں ان کا کہنا تھ کہ لوگ بنیادی بات نہیں سمجھتے، 10 سال سے گندم کی پیداوار ہماری ضرورت سے کم ہوتی تھیں، جس کی وجہ سے پھر گندم امپورٹ کرنی پڑتی ہے، اس سال بھی گندم کی امپورٹ کی تجویز آئی تو ہم نے ٹی سی پی کے ذریعے امپورٹ نا کرنے کا فیصلہ کیا کیونکہ پہلے سے 297 ارب کا مقروض یہ ادارہ مزید قرض کے نیچے آجاتا، ہم نے یہ معاملہ پرائیوٹ پر چھوڑدیا، پرائیویٹ سیکٹر سے ود ہولڈنگ ٹیکس کی مد میں 78 ملین ڈالر قومی خزانے میں جمع ہوئے، گندم کی امپورٹ کی وجہ سے ملک میں آٹا سستا ہوگیا، اس کو اسکینڈل کیسے کہا جارہا ہے؟
عمران خان سے متعلق سوال کے جواب میں ان کا کہنا تھا کہ میں عمران خان کے بارے میں مثبت رائے رکھتا تھا مگر اب میری رائے بدل گئی ہے، میں نے انہیں ووٹ دیا تھا تو اس لیے نہیں دیا تھا کہ وہ جی ایچ کیو پر چڑھ دوڑیں،9 مئی کو ریاست کو چیلنج کیا گیا جو کہ انتہائی غلط قدم تھا۔
انہوں نے مزید کہا کہ دنیا میں کہیں کسی وزیراعظم کی گرفتاری پر ایسا احتجاج نہیں ہوا، اسرائیل، اٹلی اور پاکستان میں پہلے بھی وزیراعظم گرفتار ہوئے ہیں، گرفتاری کی مزاحمت ریاست کے خلاف قدم ہے، قانونی ریلیف کی طرف جاسکتے تھے، عمران خان کو ریاست معاف کرسکتی ہے مگر اس کیلئے احساس ندامت ضروری ہے۔
انوارالحق کاکڑ نے کہا کہ بلوچستان کا مسئلہ بھوک ، افلاس یا بیروزگاری نہیں ہے، وہاں مسئلہ یہ ہے کہ ایک گروہ شناخت کی بنیاد پر نیا جغرافیہ چاہتا ہے، یہ گروہ کھل کر کہتا ہے کہ ہٹلر کے جرمنی کی طرح ایسا علاقہ ہونا چاہیے جس میں صرف بلوچ رہتے ہوں اور کوئی دوسرا نا ہو اور اس مقصد کیلئے وہ مرنے مارنے کو بھی جائز سمجھتے ہوں۔
آرمی چیف کی توسیع سے متعلق سوال کےجواب میں سابق نگراں وزیراعظم کا کہنا تھا کہ میں وزیراعظم ہوتا تو میں ضرور توسیع دیتا، مگر بات یہ نہیں ہے، اس معاملے کو سیاسی کے بجائے سیکیورٹی کے زاویے سے دیکھنا چاہیے، میں تو توسیع کے قانون سے بھی اتفاق نہیں کرتا، یہ قانون سیاسی زاویے تشکیل دیتا ہے، آرمی چیف کو 3 سال کی توسیع کے بعد اگر آخری دن جنگ چھڑ جائے تو کیا 10 دن کی بھی توسیع نہیں دی جائے گی؟
انہوں نے مزید کہا کہ میں آج چاہوں تو شہباز شریف کی کابینہ کا رکن بن سکتا ہوں، ہوسکتا ہے کہ وزیراعظم میرے کیے کوئی کردار دیکھ لیں، وزیراعظم پاکستان رہنے کے بعد وہ کون سا عہدہ ہوگا جس کی خواہش ہوگی ؟ چیئرمین سینیٹ یا اسپیکر قومی اسمبلی آئینی عہدے ہیں مگر چونکہ میں کسی جماعت کا حصہ بننے کو تیار نہیں تھا اس لیے مجھے یہ عہدے نہیں مل سکتے۔
