برطانیہ کی جانب سے پاکستانیوں پر سفری پابندیاں نرم
برطانیہ نے پاکستان کو نئی سفری فہرست میں شامل کر لیا،جس کے بعد پاکستانیوں کیلئے سفری پابندیوں میں نرمی کردی گئی ہے،برطانوی ہائی کمشنر کرسچن ٹرنر کے مطابق کورونا کی تسلیم شدہ مکمل ویکسینیشن کے ساتھ برطانیہ جانیوالے پاکستانیوں کو اب برطانیہ میں قرنطینہ نہیں کرنا پڑے گا،انہیں نادرا سرٹیفکیٹس دکھا کر صرف دو روز کے اندر ٹیسٹ کرانا ہوگا۔
برطانوی حکام کے جاری بیان کے مطابق اس فیصلے کے بعد ریڈ لسٹ میں شامل ممالک کی تعداد 7 رہ گئی، پاکستان سمیت 47 ممالک کو ریڈ لسٹ سے نکالا گیا ہے،ان ممالک میں برازیل، گھانا، ہانگ کانگ، بھارت، جنوبی افریقا اور ترکی بھی شامل ہیں،اعلان کردہ 47 ممالک پیر سے برطانیہ کی جاری کردہ ریڈ لسٹ سے نکل جائیں گے،برطانوی ہیلتھ سیکیورٹی ایجنسی کے مطابق ان ممالک سے آنیوالے مکمل ویکسینیٹڈ اور 18 سال سے کم عمر افراد کو اب صرف برطانیہ پہنچنے کے دوسرے دن ٹیسٹ کرانا ہوگا۔
برطانوی سیکریٹری ٹرانسپورٹ کے مطابق ان ممالک سے آنے والے مسافروں کو پی سی آر ٹیسٹ بھی نہیں کرانا ہوگا،لیکن تمام مسافروں کے لیے لوکیٹر فارم بھرنا لازمی ہوگا،ایسٹرا زینیکا، فائزر، موڈرنا اور جانسن ویکسین لگوانے والوں کو قرنطینہ سے استثنیٰ ہو گا۔
گیارہ اکتوبر سے برطانیہ میں منظور شدہ چار ویکسینز میں سے کسی ایک کی پاکستان میں مکمل طور پر ویکسین لگائے جانے پر آئی سولیشن ہونے یا پری ڈیپارچر ٹیسٹ کی ضرورت نہیں ہو گی۔
