بھارتی کرکٹ کمنٹیٹر ہرشا بھوگلے نے پاکستان کرکٹ ٹیم میں مسائل کا ذمہ دار لاہور قلندرز کو قرار دیتے ہوئے کہا ہے کہ لاہور قلندرز کی فرنچائز دنیا کرکٹ میں کافی بااثر ہے۔
تفصیلات کے مطابق بھارت کے مشہور کرکٹر کمنٹیٹر ہرشا بھوگلے نے پاکستان کے موجودہ کرکٹ مسائل کے حوالے کرک بز سے گفتگو کرتے ہوئے کہا کہ آپ دیکھ رہے ہیں پاکستان میں ٹیم کی قیادت کا شور کہاں سے آرہا ہے، لاہور قلندرز کی فرنچائز کرکٹ کی دنیا میں کافی بااثر ہے اور اسی وجہ سے پاکستان کرکٹ میں تنازعات بھی جنم لے رہے ہیں۔
انہوں نے مزید کہا کہ پاکستان میں ممکنہ کپتان کے طور پر شاہین آفریدی کا نام سب سے زیادہ لیا جارہا ہے، کیونکہ وہ لاہور قلندرز کو پاکستان سپر لیگ کا ٹائٹل بھی جتواچکے ہیں جس سے ان کی قائدانہ صلاحتیوں کو اجاگر کیا ہے، تاہم ان کی انجریز تشویش کا باعث ہے اور انجریز کی وجہ سے قیادت ان کیلئے بوجھ بن سکتی ہے۔
ہرشا بھوگلے نے کہا کہ اگر پاکستان ورلڈ کپ میں کےاگلے تین میچز جیت جائیں اور اچانک سیمی فائنل میں پہنچ جاتا ہے تو کیا بابراعظم ایک اچھے کپتان بن جائیں گے اور شاہین کپتانی کے دعویدار نہیں رہیں گے؟
خیال رہے کہ ورلڈ کپ میں مسلسل میچز میں شکست کے بعد پاکستان نے بنگلہ دیش کو اچھے مارجن سے ہرا کر ٹورنامنٹ میں سیمی فائنل تک رسائی کی امیدیں جاگ گئی ہیں، اب پاکستان کو اپنے اگلے 2 میچز میں جیت اور نیوزی لینڈ کی ہار سیمی فائنل تک لے جاسکتی ہے۔
