قومی کرکٹ ٹیم کے سابق کپتان اور فاسٹ باؤلر شاہین آفریدی کے سسر شاہد آفریدی نے انکشاف کیا ہے کہ کپتانی کے حوالے سے شاہین آفریدی نے میری بات نہیں مانی۔
تفصیلات کے مطابق شاہد آفریدی نے ایک سوشل میڈیا پروگرام میں خصوصی گفتگو کرتے ہوئے کہا کہ میں نے شاہین آفریدی کو ہمیشہ کپتانی سے دور رکھنے کی کوشش کی، میں چاہتا ہوں شاہین آفریدی اپنی کرکٹ پر توجہ دیں، جب لاہور قلندرز کی جانب سے شاہین کو کپتانی کی آفر ہوئی تو میں نے شاہین سے کہا تھا کہ دوررہو۔
شاہد آفریدی نے مزید کہا کہ میں نے خود سمیت کئی سابق کپتانوں کا اختتام اچھا نہیں دیکھا، اسی لیے میں نے شاہین کو کپتانی سے دور رہنے کا مشورہ دیا مگر شاہین آفریدی نے اس حوالے سے میری بات نہیں مانی۔
انہوں نے مزید کہا کہ میں نے سابق چیئرمین پی سی کو بابراعظم کو ٹیسٹ کا کپتان برقرار رکھنے اور وکٹ کیپر بیٹسمین محمد رضوان کووائٹ بال کا کپتان بنانے کا مشورہ دیا تھا۔
سوشل میڈیا کے حوالے سے گفتگو کرتے ہوئے شاہد آفریدی کا کہنا تھا کہ ملک میں ایسے بہت سے علاقے ہیں جہاں تعلیم سے پہلے سوشل میڈیا پہنچا ہے، سوشل میڈیا کو استعمال کرنے کیلئے تعلیم کی بہت ضرورت ہے۔