کراچی میں ایک اور کم سن بچی کے ساتھ جنسی زیادتی کا واقعہ پیش آیا ہے ، اس بار زیادتی کرنےو الا خود ایک کم سن لڑکا ہے ۔
خبررساں ادارے اے آروائی نیوز کی رپورٹ کے مطابق کراچی کے علاقے موسیٰ کالونی کے رہائشی 16 سالہ لڑکے نے موبائل فون کے بے جا اور غلط استعمال کے نتیجے میں اپنی ہی معصوم رشتہ دار بچی کو مبینہ طور پر جنسی زیادتی کا نشانہ بنا ڈالا ہے۔
رپورٹ کے مطابق رات گئے تک آزادنہ طور پر موبائل فون استعمال کرنے کی عادت میں مبتلا لڑکے کے موبائل سے غیر اخلاقی مواد بھی برآمد ہوا ہے ۔
پولیس کا کہنا ہے کہ متاثرہ بچی کے والد نے پولیس شکایت درج کروائی تھی جس کے مطابق ملزم نے ان کی معصوم بچی کو اپنی جنسی ہوس کی بھینٹ چڑھا دیا ہے۔
لڑکے کے اہلخانہ اور دیگر لوگوں سے تفتیش کے دوران پولیس کو معلوم ہوا کہ ملزم رات دیر تک موبائل فون استعمال کرتا تھا، جس پر پولیس نے ملزم کا موبائل فون قبضے میں لے کر جانچ کی تو اس میں سے غیر اخلاقی ویڈیوز برآمد ہوئیں۔
پولیس نے بچی اور لڑکے کے ڈی این اے سیمپلز حاصل کرکے فارنزک کیلئے بھجوادیئے ہیں جس کی رپورٹ آنے کے بعد ہی جنسی زیادتی کی تصدیق یا تردید ہوسکے گی۔
تاہم لڑکے نے دوران تفتیش پولیس کو اپنا اعترافی بیان جمع کروادیا ہے، پولیس کے مطابق لڑکے کی عمر کے تعین کیلئے سندھ سروسز اسپتال سے میڈیکل بھی کروالیا گیا ہے۔
پولیس کا کہنا ہے کہ ملزم کی اصل عمر کے تعین اور ڈی این اے سیمپلز کی فرانزک رپورٹ آنے کے بعد ہی کیس کو آگے بڑھایا جائے گا۔