گزشتہ دنوں کراچی کے علاقے صدر میں ہونے والے بم دھماکے کے نتیجے میں مچنے والی بھگدڑ کے دوران 15 سالہ لڑکی کے مبینہ طور پر اغوا کا انکشاف ہوا ہے۔
پولیس حکام کے مطابق 15 سالہ لڑکی کے اغوا کا مقدمہ پریڈی پولیس نے درج کر لیا ہے۔
اغوا ہونے والی لڑکی کے بھائی کا مقدمہ درج کرواتے ہوئے بتانا ہے کہ میری اہلیہ، بہن اور والدہ پنجاب کالونی سے خریداری کرنے صدر آئے تھے، خریداری کر کے واپس آ رہے تھے کہ دھماکا ہوا اور بھگدڑ مچ گئی۔
لڑکی کے بھائی کا کہنا ہے کہ دھماکے سے بھگدڑ مچی تو والدہ رش میں گر کر بیہوش ہوگئیں تھیں، پندرہ بیس منٹ بعد والدہ کو ہوش آیا تو بہن سویرا غائب تھی۔
پولیس کے مطابق سویرا کے اغوا کا مقدمہ نامعلوم افراد کے خلاف درج کر لیا گیا ہے۔ ایف آئی آر میں کہا گیا ہے کہ متاثرہ خاندان نے اپنے طور پر لڑکی کو بہت تلاش کیا ہے مگر اس کا کوئی سراغ نہیں ملا۔
