علی محمد خان نے کپتان سے اڈیالہ جیل راولپنڈی میں ہونے والی ملاقات کا تمام احوال بیان کر دیا
سابق وفاقی وزیر ورہنما پاکستان تحریک انصاف علی محمد خان نے سماجی رابطوں کی ویب سائٹ ٹوئٹر پر سابق وزیراعظم و بانی پی ٹی عمران خان سے اڈیالہ جیل راولپنڈی میں ہونے والی ملاقات کا احوال بیان کر دیا۔ علی محمد خان نے اپنے ٹوئٹر پیغام میں لکھا: ابھی اڈیالہ جیل راولپنڈی میں عمران خان صاحب سے ملاقات ہوئی ہے۔ سردار لطیف کھوسہ صاحب اور محمد عامر ڈوگر صاحب بھی اس ملاقات کے موقع پر موجود تھے۔
انہوں نے بتایا کہ عمران خان کی صحت ماشاء اللہ بہت اچھی تھی اور وہ بہت ہشاش بشاش لگ رہے تھے، یہ ملاقاتی آدھے گھنٹے تک جاری رہی۔ اپنے لیڈر سے اتنے عرصے کے بعد مل کر بہت اچھا لگا، مردان کی تاریخی جیت کا سن کر وہ بہت خوش ہوئے۔ اڈیالہ جیل میں گزارے گئے میرے وقت بارے وہ سارا جانتے تھے اور بہت خوش تھے کہ میں نے جوانمردی سے جیل میں وقت گزارا۔
انہوں نے لکھا کہ: عمران خان نے پوچھا کتنے دن تک قید میں رہے جس پر بتایا کہ 78 دن تک قید میں رہا، انہوں نے عامر ڈوگر صاحب سے بھی ان کے جیل میں گزارے گئے دنوں کا پوچھا، وہ ملتان کی نشست پر ان کی کامیابی پر بہت خوش تھے۔ سردار لطیف کھوسہ نے خان صاحب کو کہا لاہور کی سیٹ ان کی امانت ہے جس پر خان صاحب نے کہا نہیں میں میانوالی والی سیٹ پر آئوں گا، انشاء اللہ!
انہوں نے لکھا کہ: میں اپنے لیڈر کی قدرشناسی کا دل سے ان کا شکرگزار ہوں، قوم کے لیڈر سے قومی مسائل پر تفصیلی گفتگو ہوئی، بہت سی ضروری ہدایات بھی دی ہیں جن کے بارے میں آپ کو بعد میں آگاہ کریں گے۔ خان صاحب نے سب سے بڑی بات جو کی ہے وہ یہ ہے کہ پاکستان تحریک انصاف اقتدار میں آکر فتح مکہ کے ماڈل پر جائے گی۔
انہوں نے کہا کہ کوئی سیاسی انتقام نہیں لیں گے بلکہ ملک وقوم کی ترقی واستحکام کی خاطر ملک وقوم کو آگے لے کر جائیں گے۔ خان صاحب نے نیلسن منڈیا کے ٹرتھ اینڈ ری کنسی لی ایشن کا حوالہ بھی دیا کہ ملک کو آگے لے جانے کیلئے سچ ، معافی اور درگزر کی طرف جانا ہوگا۔
انہوں نے لکھا کہ: پاکستان تحریک انصاف اقتدار میں آنے کے بعد پاکستان کو انتقام نہیں سیاسی استحکام و ترقی کی طرف لے کر جائے گی۔ انشاءاللٰہ ! قوم کے لیڈر کی سوچ اور بڑے دل کو سلام ہے! پاکستان زندہ باد ، عمران خان پائندہ باد!
