اے این پی خیبر پختونخوا کے صدر ایمل ولی خان نے انتخابات کو تاریخ کے بدترین انتخابات قرار دیتے ہوئے کہا ہے کہ یہ انتخابات سوداگری کے انتخابات تھے۔
تفصیلات کے مطابق عوامی نیشنل پارٹی خیبر پختونخوا کے صدر ایمل ولی خان نے پشاور میں پریس کانفرنس کرتے ہوئے 8 فروری کے انتخابات کے حوالے سے اپنے تحفظات کا اظہار کرتے ہوئے کہا کہ 8 فروری کو ہونے والے انتخابات تاریخ کے بدترین انتخابات تھے، پی ٹی آئی کے حمایت یافتہ امیدواروں کے ساتھ ڈیل کی گئی، خیبر پختونخوا سے آزاد امیدواروں کو جتوایا گیا۔
انہوں نے مزید کہا کہ الیکشن میں سوداگری کا بازار لگایا گیا، بہت سے امیدواروں نے پیسے لگا کر اپنی سیٹیں جیتیں، حیات آباد سے سے ایک افغان شہری الیکشن جیت کر رکن اسمبلی بن گیا۔
ایمل ولی خان نے انتخابی نتائج مسترد کرتے ہوئے تمام وہ حلقے کھولنے کا مطالبہ کیا جس میں اے این پی دوسرے نمبر پر آئی ہے،انہوں نے کہا کہ ہم نے اس ملک کیلئے قربانیاں دی ہیں میں اپنی جدوجہد جاری رکھوں گا، ہمیں قوم کی خدمت اور ترجمانی کیلئے پارلیمان کی ضرورت نہیں، کچھ لوگ اس ملک کو کھارہے ہیں۔