پاکستان کے سیاسی منظر نامے پر ایک بار پھر مولانا فضل الرحمن کی جانب سے شدید تنقیدی بیانات سامنے آئے ہیں۔گزشتہ روز انہوں نے صحافیوں سے رات گئے گفتگو کی اور موجودہ حکومت، اسٹیبلشمنٹ، اور ملکی صورتحال پر کھل کر اپنے خیالات کا اظہار کیا۔
انہوں نے ملک میں جاری سیاسی بحران، انتخابی دھاندلی، اور حکومتی نااہلی کو تنقید کا نشانہ بناتے ہوئے کہا کہ "ملک میں ساری خرافات کی ذمہ دار اسٹیبلشمنٹ ہے۔ دھاندلی اسی اسٹیبلشمنٹ نے کی ہے۔ وزیراعظم، صدر، اور محسن نقوی اس منصب کے اہل نہیں۔ ہر شاخ پر الو بیٹھا ہے۔"
مولانا فضل الرحمن نے کہا کہ عسکری قیادت بھی موجودہ حکومت پر اعتماد نہیں رکھتی۔ ان کے مطابق، ملک میں جاری تمام تر خرابیوں کی جڑ اسٹیبلشمنٹ ہے، جس نے انتخابات میں دھاندلی کی اور ملک کو بحران کی جانب دھکیل دیا۔ انہوں نے واضح کیا کہ موجودہ حکومت ناجائز ہے اور اسے عوام کی حمایت حاصل نہیں۔
عمران خان کو جیل میں رکھے جانے کے معاملے پر مولانا فضل الرحمن نے کہا کہ پاپولر لیڈرز کو اسٹیبلشمنٹ کبھی پسند نہیں کرتی۔ انہوں نے اس بات پر تشویش کا اظہار کیا کہ عمران خان کی گرفتاری اور ان کے خلاف کیے جانے والے اقدامات درحقیقت عوامی رہنماؤں کو خاموش کرنے کی کوشش ہیں۔
ان کا کہنا تھا کہ مائنس ون کی سیاست پر یقین نہیں رکھتے، عمران خان پاپولر ہے، مقتدرہ کو پاپولر سیاستدان پسند نہیں
مولانا فضل الرحمن نے موجودہ حکومت کی پالیسیوں پر بھی سخت تنقید کرتے ہوئے کہا کہ "حکومت نے ٹرمپ کو بکرا پیش کیا، ٹرمپ خوش ہوا، اور حکومت نے عید منائی۔ کل کو اپنی ناجائز حکومت بچانے کے لیے ہم میں سے کسی کو بھی بکرا بنا کر پیش کر سکتے ہیں۔" ان کا کہنا تھا کہ حکومت اپنی بقا کے لیے کسی بھی حد تک جانے کو تیار ہے۔
ملک میں بڑھتے ہوئے بحران اور سیاسی عدم استحکام پر مولانا فضل الرحمن نے سوال اٹھایا کہ "کیا ملک کو تقسیم کرنے کا فیصلہ کر لیا گیا ہے؟ یہ فیصلہ کہاں ہوا ہے؟" انہوں نے خبردار کیا کہ اگر صورتحال پر قابو نہ پایا گیا تو ملک مزید تقسیم کا شکار ہو سکتا ہے۔
مولانا فضل الرحمن نے پیپلز پارٹی کے رہنما آصف زرداری پر بھی تنقید کرتے ہوئے کہا کہ "موجودہ ملکی صورتحال میں آصف زرداری انجوائے کر رہا ہے۔ آصف زرداری ملک کی واحد شخصیت ہے جو ایک صوبائی اسمبلی اور ایوان صدر خریدنے کی صلاحیت رکھتا ہے۔" ان کا کہنا تھا کہ زرداری جیسے رہنما ملک کی سیاست کو مزید خراب کر رہے ہیں۔
مولانا فضل الرحمن نے انتخابات میں ہونے والی دھاندلی پر بھی سخت تنقید کی۔ انہوں نے کہا کہ "الیکشنز میں چوری نہیں، ڈاکے ڈالے گئے۔ ہم شاہد ہیں۔ سیاست کو دھاندلی سے پاک کریں، آئین پر عمل کریں۔ عوام پارلیمنٹ سے ناراض ہیں، ایسے ملک نہیں چل سکتا۔" انہوں نے مطالبہ کیا کہ انتخابات کو شفاف بنایا جائے اور آئین کے مطابق کام کیا جائے۔
چیف الیکشن کمشنر پر تنقید کرتے ہوئے انہوں نے کہا کہ چیف الیکشن کمشنر اور دو ممبران کی مدت مکمل ہوگئی،اب وہ عہدے چھوڑ دیں،کیا نوکری اور مفت پٹرول کےلئے حکومت کہےگی تو بیٹھے رہیں گے
مولانا فضل الرحمن نے اپنے خلاف جاری کیے جانے والے تھریٹ الرٹ کو مضحکہ خیز قرار دیتے ہوئے کہا کہ "مجھے بھجوایا گیا تھریٹ الرٹ مضحکہ خیز تھا۔ میرے کردار سے فتنہ الخوارج کو نہیں، ان کو خطرہ ہے۔ جان اللہ کے پاس ہے، ڈرنے والے نہیں، گھر بیٹھے بھی جان جا سکتی ہے۔" انہوں نے واضح کیا کہ وہ کسی بھی خطرے سے نہیں ڈرتے اور اپنے موقف پر ڈٹے رہیں گے۔
مولانا فضل الرحمن نے ملک کی موجودہ صورتحال پر گہری تشویش کا اظہار کرتے ہوئے کہا کہ "اس وقت ملک آگ کی لپیٹ میں ہے۔ نہ فوج کے ہاتھوں قوم محفوظ ہے، نہ مسلح تنظیموں کے ہاتھوں قوم محفوظ ہے۔" انہوں نے زور دیا کہ ملک کو اس بحران سے نکالنے کے لیے فوری اقدامات کی ضرورت ہے۔
ان کا کہنا تھا کہ ملکی موجودہ سیاسی صورتحال میں میاں نواز شریف اہم کردار ادا کرسکتے ہیں۔ اگر نواز شریف سمجھتے ہیں ایک صوبہ میں حکومت سے کام چل گیا تو ملک کہاں گیا۔
مولانا نے جواب دیا کہ اگر نوازشریف پنجاب اور وفاق کی حکومت لے کر بلوچستان اور کے پی کی صورتحال خاموش بیٹھتے ہیں تو پھر میں اس کا کیا مطلب لوں؟ کی پی اور بلوچستان جل رہا ہو اور پنجاب کی حکومت لے کر خاموشی ہو تو پھر ملک تو ہمارے ہاتھ سے گیا۔
