پشاور: وزیراعلیٰ خیبر پختونخوا علی امین گنڈاپور نے کہا ہے کہ ضلع مردان کے پہاڑی علاقے کاٹلنگ میں دہشت گردوں کے خلاف کارروائی کے دوران عام شہریوں کی شہادتوں کے افسوسناک واقعے کی تمام پہلوؤں سے انکوائری کی جائے گی تاکہ حقیقت سامنے آ سکے۔
کاٹلنگ واقعے سے متعلق اپنے بیان میں وزیراعلیٰ نے کہا کہ انکوائری رپورٹ آنے کے بعد صوبائی حکومت اس واقعے پر اپنا واضح موقف دے گی۔ انہوں نے عام شہریوں کی شہادتوں کو قابل مذمت اور افسوسناک قرار دیتے ہوئے کہا کہ اس علاقے میں پہلے بھی دہشت گردوں کے خلاف کارروائیوں میں محسن باقر اور عباس جیسے خطرناک دہشت گردوں کو ہلاک کیا جا چکا ہے۔
وزیراعلیٰ نے مزید کہا کہ سرکاری اطلاعات کے مطابق ہفتے کی صبح دہشت گردوں کے خلاف کارروائی کے دوران 12 دہشت گرد ہلاک ہوئے۔
علی امین گنڈاپور نے اس افسوسناک واقعے میں جاں بحق افراد کے لواحقین کے ساتھ گہری ہمدردی اور تعزیت کا اظہار کیا اور کہا کہ صوبائی حکومت ان کے دکھ میں برابر کی شریک ہے۔ انہوں نے یقین دہانی کرائی کہ صوبائی حکومت جاں بحق افراد کے لواحقین کو تنہا نہیں چھوڑے گی اور ان کی ہر ممکن معاونت کی جائے گی۔
وزیراعلیٰ نے اس عزم کا اظہار کیا کہ صوبائی حکومت اور صوبے کے عوام دہشت گردوں کے خاتمے کے لیے پر عزم ہیں اور اس مقصد کے لیے کوئی کسر نہیں چھوڑیں گے۔
