بیرون ملک ملازمت کے لیے جانے والے پاکستانیوں کی تعداد میں اضافہ، بیورو آف امیگریشن کی رپورٹ جاری
اسلام آباد: بیورو آف امیگریشن نے سال 2025 کے پہلے تین ماہ کے دوران بیرون ملک روزگار کی غرض سے جانے والے پاکستانیوں کے تازہ اعداد و شمار جاری کر دیے ہیں۔
رپورٹ کے مطابق جنوری سے مارچ کے دوران مجموعی طور پر 1 لاکھ 72 ہزار 144 پاکستانی بیرون ملک ملازمت کے لیے روانہ ہوئے، جن میں سے 99 ہزار 139 افراد کا تعلق مزدور پیشے سے تھا۔
تفصیلی اعداد و شمار کے مطابق، 38 ہزار 274 ڈرائیورز، 1 ہزار 859 مستری، اور 1 ہزار 689 باورچی بھی بیرون ملک کام کے مواقع حاصل کرنے میں کامیاب ہوئے۔
پیشہ ور افراد میں 849 ڈاکٹرز، 1 ہزار 479 انجینئرز، 390 نرسز، 3 ہزار 474 ٹیکنیشنز اور 1 ہزار 58 ویلڈرز شامل تھے۔ اس کے علاوہ 2 ہزار 130 الیکٹریشنز اور 436 اساتذہ نے بھی بیرون ملک ملازمت اختیار کی۔
ممالک کے لحاظ سے، سعودی عرب پاکستانیوں کی پہلی ترجیح رہا جہاں 1 لاکھ 21 ہزار 970 افراد گئے۔ دیگر نمایاں مقامات میں یو اے ای (6 ہزار 891)، عمان (8 ہزار 331)، قطر (12 ہزار 989)، بحرین (939)، ملائیشیا (775)، چین (592)، آذربائیجان (350)، جرمنی (264) اور یونان (815) شامل ہیں۔
اسی طرح 108 پاکستانی جاپان، 109 اٹلی، 870 ترکیہ، 1 ہزار 454 برطانیہ اور 257 امریکی ریاستوں میں ملازمت کے لیے روانہ ہوئے۔
