![5larkakananshsoodkdlkd.png](https://www.siasat.pk/data/files/s3/5larkakananshsoodkdlkd.png)
لاڑکانہ میں پولیس افسر کے بیٹے نے قانون کی دھجیاں اڑاکررکھ دیں، ایس ایچ او کا بیٹا نا صرف تھانے کا کرتا دھرتا بن گیا بلکہ لاک اپ میں قید طلباء کو بدترین تشدد کانشانہ بھی بناتا رہا، واقعہ کی ویڈیو منظر عام پر آگئی۔
تفصیلات کے مطابق لاڑکانہ کے علاقے باڈہ میں ایس ایچ او کا بیٹا مبینہ طور پر تھانہ چلانے لگا ہے، ایس ایچ او کے بیٹے نے لاک اپ میں قید دو بھائیوں یاسر پٹھان اور مزمل پٹھان کو اپنے نجی گن مینز کے ہمراہ تشدد کا نشانہ بنایا جس کی ویڈیو بھی سامنے آگئی ہے۔
تشدد کا نشانہ بننے والے طلباء کے اہلخانہ کا کہنا ہے کہ یاسر پٹھان اور مزمل پٹھان ایک شادی سے واپس آرہے تھے، پولیس نے دونوں بھائیوں کو گرفتار کرکے لاک میں بند کیا جہاں دونوں بھائیوں کو تشدد تشدد کا نشانہ بنایا گیا۔
ورثاء اور علاقے کے دیگر افراد کی بڑی تعداد دونوں بھائیوں کی گرفتاری کے بعد باڈہ تھانے پہنچی تو پولیس نے دونوں قیدیوں کو رہا کردیا جبکہ واقعہ کی ویڈیو منظر عام پر آنے کے بعد ڈی ایس پی لاڑکانہ نے ایس ایچ او باڈہ رحمت اللہ سولنگی اور چار اہلکاروں کو معطل کرکے تحقیقات کی ہدایات جاری کردی ہیں۔
واقعہ کی تفصیلات بتاتے ہوئے ترجمان پولیس کے مطابق ڈی ایس پی حیدری میڈم پارس بکھرانی کے ساتھ تھانہ باڈہ پہنچے اور انہوں نے تشدد کا نشانہ بننے والے نوجوانوں اور ان کے اہلخانہ سے ملاقات کی اور ذمہ داران کے خلاف کارروائی کی یقین دہانی کروائی۔