بنگلہ دیش کے سابق کرکٹ کپتان تمیم اقبال کو میچ کے دوران دل کا دورہ، انجیو پلاسٹی کرائی گئی
ڈھاکا: بنگلہ دیش کے سابق کرکٹ کپتان تمیم اقبال کو ڈھاکہ پریمیئر ڈویژن کرکٹ میچ کے دوران شدید سینے میں تکلیف ہوئی، جس کے بعد انہیں ہسپتال منتقل کر کے انجیو پلاسٹی کروانی پڑی۔
بین الاقوامی کرکٹ ویب سائٹ ’کرک انفو‘ کے مطابق، یہ واقعہ محمڈن اسپورٹنگ کلب اور شائن پوکر کرکٹ کلب کے درمیان 50 اوور کے میچ کے دوران پیش آیا۔ 36 سالہ تمیم اقبال، جو محمڈن اسپورٹنگ کلب کی قیادت کر رہے تھے، صرف ایک اوور کھیلنے کے بعد سینے میں شدید درد کی شکایت کرتے ہوئے میدان سے باہر چلے گئے۔ انہیں فوری طور پر قریبی ہسپتال منتقل کیا گیا۔
میچ ریفری دیبابراتا پال کے مطابق، ابتدا میں تمیم کو ہیلی کاپٹر کے ذریعے منتقل کرنے کا منصوبہ بنایا گیا، لیکن بی کے ایس پی گراؤنڈ سے پرواز ممکن نہ ہونے کی وجہ سے انہیں فضیلۃ النساء اسپتال لے جایا گیا۔
ہسپتال کے ڈاکٹروں نے بتایا کہ تمیم اقبال کی حالت تشویشناک تھی اور انہیں دل کا دورہ پڑا تھا۔ رکاوٹ دور کرنے کے لیے انجیوگرافی اور انجیو پلاسٹی کی گئی۔ فی الحال وہ ڈاکٹروں کی نگرانی میں ہیں۔
تمیم اقبال نے جنوری 2024 میں بین الاقوامی کرکٹ سے دوسری بار ریٹائرمنٹ کا اعلان کیا تھا۔ اس سے قبل جولائی 2023 میں بھی انہوں نے ریٹائرمنٹ کا اعلان کیا تھا، لیکن وزیراعظم شیخ حسینہ کی درخواست پر 24 گھنٹوں کے اندر اپنا فیصلہ واپس لے لیا تھا۔
تمیم اقبال نے بنگلہ دیش کے لیے 70 ٹیسٹ میچز میں 5 ہزار 134 رنز اور 243 ون ڈے انٹرنیشنل میں 8 ہزار 357 رنز بنائے، جبکہ نے 78 ٹی 20 انٹرنیشنل میں بھی ایک ہزار 758 رنز اسکور کیے۔
