گھوٹکی: جمعیت علمائے اسلام ف کے رہنما، راشد محمود سومرو نے کہا ہے کہ اگر بھارت نے پانی بند کرنے کی غلطی کی تو ہم بھارت میں گھس کر دارالعلوم دیوبند میں ناشتہ کریں گے۔
گھوٹکی میں ایک جلسہ عام سے خطاب کرتے ہوئے راشد محمود سومرو نے کہا کہ بھارت نے دھمکی دی ہے کہ وہ سندھ طاس معاہدہ ختم کر کے پاکستان کا پانی بند کر دے گا۔ انہوں نے کہا کہ بھارت اگر پانی بند کرنے کی کوشش کرے، تو ہم دیکھیں گے کہ وہ کیا کرتا ہے، اور وہ ہمیشہ یہ بات یاد رکھے گا۔
راشد محمود سومرو نے مزید کہا کہ مولانا فضل الرحمان نے کہا تھا کہ اگر پاکستان کے لیے لڑنا پڑا تو وہ پاک فوج کے شانہ بشانہ ہوں گے۔ ہم بھارت میں گھس کر دارالعلوم دیوبند میں اپنے مسلم بھائیوں کے ساتھ ناشتہ کریں گے۔
جے یو آئی کے رہنما نے یہ بھی کہا کہ ہم ایک قطرہ پانی اپنے بھائیوں پنجاب اور بلوچستان کو دینے کے لیے تیار نہیں، تو بھارت کو کیسے دیں گے؟ ہم اپنے پانی کے لیے لڑ سکتے ہیں اور بھارت کا جینا دوبھر کر دیں گے۔
یاد رہے کہ 22 اپریل کو مقبوضہ کشمیر کے سیاحتی مقام پہلگام میں نامعلوم افراد کی فائرنگ سے کم از کم 27 افراد ہلاک اور متعدد زخمی ہو گئے تھے۔ اس واقعے کے فوراً بعد بھارت کی طرف سے سوشل میڈیا پر پاکستان پر الزامات عائد کیے گئے، اور سندھ طاس معاہدہ ختم کرنے کے مطالبات بھی شروع ہو گئے۔
اس کے علاوہ بھارتی میڈیا میں سندھ طاس معاہدے کو ختم کرنے سمیت مختلف اقدامات کے اشارے دیے گئے، اور بعد میں بھارتی حکومت کی جانب سے ایسے ہی اعلانات کیے گئے، جس سے یہ ظاہر ہوتا ہے کہ بھارتی ایجنسیز کی دی گئی لائنز پر مین اسٹریم میڈیا اور سوشل میڈیا نے کام کیا۔
۔
