بلوچستان کے ضلع دکی میں واقع سب جیل سے تین قیدی جیل کا روشندان توڑ کر فرار ہونے میں کامیاب ہوگئے ہیں۔
تفصیلات کے مطابق تھانہ دکی کی سب جیل میں 13 قیدیوں کو قید کرکے رکھا گیا تھا جن میں قتل ، ڈکیتیوں اور دیگر جرائم میں ملوث قیدی شامل تھے جن میں سے تین قیدی فرار ہونے میں کامیاب ہوگئے ہیں۔
ایس ایچ او تھانہ دکی جلیل احمد مری کے مطابق قیدیوں کو صبح واش روم کیلئے حوالات سے باہر نکالا گیا اسی دوران عصمت اللہ، صدیق اور کبیر نامی قیدی لاک اپ کا روشندان توڑ کر فرار ہوگئے، فرار ہونے والے قیدی ڈکیتی کے مقدمات میں نامزد تھے جن میں سے دو قیدی پشین جبکہ ایک سنجاوی سے تعلق رکھتا تھا۔
واقعہ کی اطلاع ملتے ہی آئی جی جیل خانہ جات بلوچستان نے قیدیوں کے فرار ہونے کے معاملے کی تحقیقات کا حکم دیدیا ہےجبکہ پولیس نے قیدیوں کی تلاش شروع کردی ہے تاہم ابھی تک کسی بھی قیدی کا کوئی سراغ نہیں ملا ہے۔
گزشتہ روز راولاکوٹ جیل سے بھی دن دیہاڑے 20 قیدی فرار ہو گئے تھے۔ قیدیوں نے ڈیوٹی پر مامور اہلکار کو پکڑ کر اسکی آنکھوں میں مرچیں ڈالیں اور پولیس اہلکار کی بندوق چھین کر اسے یرغمال بنایا، ہوائی فائرنگ کی اور فرار ہوگئے تھے۔
