لاہور کے بازاروں میں خواتین سے موبائل فونز و دیگر قیمتی اشیاء چوری کرنے والے جیب کترے بچوں کی ویڈیو جاری کردی گئی ہے۔
تفصیلات کے مطابق یہ ویڈیو سیف سٹی اتھارٹی لاہور کی جانب سے جاری کی گئی ہے، موبائل چور گینگ بازار میں آنے والی خواتین کو ٹارگٹ کرکے بچوں کے ذریعے ان کے موبائل فون اور دیگر قیمتی اشیاء چوری کرلیتے ہیں۔
سیف سٹی اتھارٹی کی جانب سے جاری کردہ ویڈیو لاہور کے مصروف ترین انارکلی بازار میں پیش آنے والی ایسی ہی ایک واردات کی ہےجس میں گینگ نے خواتین کی ریکی اور منصوبہ بندی کے بعد کارروائی کی، ویڈیو میں دیکھا جاسکتا ہے کہ بچے رکشے میں سوار ہونے والی خواتین کے پرس سے موبائل فون نکال کر سڑک کے دوسری جانب بھاگ جاتا ہے۔
واقعہ سیف سٹی اتھارٹی کی نظروں سے گزرا تو سیف سٹی ورچوئل پیٹرولنگ آفیسر نے کیمروں کی مدد سے موبائل چوری کی اس پوری واردات کو ٹریس کیا ، اس موقع پر ترجمان سیف سٹیز کا کہنا تھا کہ شہری کسی بھی مشکوک سرگرمی یا ایمرجنسی کی صورتحال میں مددگار ہیلپ لائن 15 پررابطہ کریں۔
