مسلم لیگ ن کی سینئر نائب صدر مریم نواز شریف سینئر صحافی و اینکر پرسن کامران خان کے ایک بیان کا برا مان گئی ہیں، انہوں نے کامران خان کو جواب بھی دے دیدیا۔
تفصیلات کے مطابق کامران خان نے ٹویٹر پر الیکشن کمیشن کی جانب سے پنجاب میں 14 مئی کو انتخابات منعقد کروانے کے اعلان کو مریم نواز شریف، رانا ثناء اللہ اور پوری پی ڈی ایم کیلئے بھیانک پیش رفت قرار دیا۔
انہوں نے کہا کہ الیکشن کمیشن نے اعلان کردیا ہے کہ سپریم کورٹ کے فیصلے پر من وعن عمل درآمد کیا جائے گا، اب کس مائی کے لال کی ہمت ہے کہ الیکشن کو التوا میں ڈالے۔
کامران خان کی جانب سے اس پیش رفت کو مریم نواز اور دیگر کیلئے بھیانک قرار دینا مریم نواز شریف کو ایک آنکھ نا بھایا اور انہوں نے کامران خان کو ٹویٹر پر ہی جواب دے ڈالا۔
مریم نواز شریف نے کامران خان کو مخاطب کرتے ہوئے کہا کہ یہ پیش رفت ہمارے لیے بھیانک کیوں ہے؟ ہم تو اللہ اور عوام کی طاقت سے جیت کر آتے ہیں، بھیانک پیش رفت تو ان کیلئے ہے جو آرٹی ایس بٹھا کر ، سیلکٹ ہوکر آتے ہیں اور پھر سہولت کاروں کے بغیر لولے لنگڑے ہوجاتے ہیں۔
مریم نواز شریف نے مزید کہا کہ آپ نوٹ فرمالیں، یہ 2018 نہیں ہے اور نا ہی اس وقت نظام جنرل (ر) فیض کے شکنجے میں ہے۔
