میئر کراچی بیرسٹر مرتضیٰ وہاب نے شنگھائی کے میئر گونگ ژینگ سے ملاقات کے دوران چینی سرمایہ کاروں کو کراچی میں جاری ترقیاتی منصوبوں میں سرمایہ کاری کی دعوت دی اور چینی طلباء کے لیے تعلیمی اسکالرشپ دینے کا اعلان کیا۔
یہ ملاقات کراچی اور شنگھائی کے درمیان باہمی تعلقات کو مزید مضبوط بنانے، بنیادی ڈھانچے کی ترقی، ویسٹ ٹو انرجی منصوبوں، توانائی اور شہری خدمات سمیت اہم شعبوں میں تعاون کے مواقع تلاش کرنے کے مقصد سے منعقد ہوئی۔ میئر کراچی نے شہر کی بین الاقوامی سطح پر تعاون کے مرکز کے طور پر صلاحیت کو اجاگر کرتے ہوئے کہا کہ چینی سرمایہ کار کراچی میں بے پناہ مواقع سے فائدہ اٹھا سکتے ہیں۔
تعلیمی اور ثقافتی تعلقات کو مزید فروغ دینے کے لیے بیرسٹر مرتضیٰ وہاب نے کراچی میٹروپولیٹن یونیورسٹی کے تحت چینی طلباء کے لیے اسکالر شپ پروگرام متعارف کرانے کا اعلان بھی کیا۔ اس اقدام کا مقصد دونوں شہروں کے نوجوانوں کو ایک دوسرے کے قریب لانا اور تعلیمی تبادلے کو فروغ دینا ہے۔
میئر کراچی نے ملاقات میں یہ بھی اعلان کیا کہ کراچی میں ایک عوامی مقام تعمیر کیا جائے گا، جو چین کے عظیم رہنما اور کمیونسٹ پارٹی کے پہلے چیئرمین ماؤ زے تنگ کو خراج عقیدت پیش کرے گا۔
ملاقات کے دوران میئر کراچی اور میئر شنگھائی نے طویل مدتی شراکت داری کو فروغ دینے اور باہمی دلچسپی کے مختلف شعبوں میں مزید تعاون بڑھانے پر اتفاق کیا۔ میئر کراچی نے شنگھائی کے میئر کو سندھ کی ثقافتی پہچان 'اجرک' اور ایک یادگاری سووینئر بھی پیش کیا، جو دونوں شہروں کے درمیان دوستی کی علامت قرار دیا گیا۔
اس اعلیٰ سطحی ملاقات میں میونسپل کمشنر ایس ایم افضل زیدی، مشیر مالیات کے ایم سی گلزار علی ابڑو اور سینئر ڈائریکٹر کلچر و اسپورٹس مہدی مالوف بھی میئر کراچی کے ہمراہ موجود تھے۔
