نور مقدم قتل کیس، سی سی ٹی وی فوٹیج میں کیا کچھ نظر آیا؟ ٹرانسکرپٹ میں دل دہلا دینے والے مناظر کا ذکر
روزنامہ جنگ کے مطابق اسلام آباد کی مقامی عدالت میں ایڈیشنل سیشن جج عطاربانی نے نور مقدم قتل کیس کی سماعت کی تو دوران سماعت عدالت میں سی سی ٹی وی فوٹیج کا ٹرانسکرپٹ بھی پیش کیا گیا جس میں کچھ ایسے واقعات کا ذکر ملا جو کہ بہت ہی خوفناک اور دل دہلا دینے والے رہے ہوں گے۔
سی سی ٹی وی ٹرانسکرپٹ سے متعلقہ اہم دستاویز میں بتایا گیا کہ ڈی وی آر کیمرے کا وقت پاکستان کے اسٹینڈرڈ وقت سے 35 منٹ ایڈوانس ہے۔ ٹرانسکرپٹ کے مطابق 18 جولائی کو رات 10 بجکر 18 منٹ پر نور مقدم فون سنتے ہوئے ملزم ظاہر جعفر کے گھر میں داخل ہوئیں۔
19 جولائی کو رات 2 بجکر 39 منٹ پر ظاہر جعفر اور نور مقدم بیگ لے کر گیٹ سے نکلتے نظر آتے ہیں اور مین گیٹ کے باہر ٹیکسی میں سامان رکھ کر دوبارہ گھر میں داخل ہوئے۔ بعد ازاں رات 2 بجکر 41 منٹ پر نور مقدم انتہائی گھبراہٹ خوف میں ننگے پاؤں گیٹ کی طرف بھاگ کر آتی ہے، چوکیدار افتخار گیٹ کو بند کرتا نظر آتا ہے۔
ٹرانسکرپٹ کے مطابق اس دوران ظاہر جعفر جلدی آکر مین گیٹ پر نور مقدم کو دبوچ لیتا ہے، نور مقدم ہاتھ جوڑ کر ظاہر ذاکر جعفر کی منت سماجت کرتی نظر آتی ہے۔ مبینہ قاتل ظاہر جعفر نور مقدم کو کھینچ کر گھر میں لے جاتا ہے، پھر رات 2 بجکر 46 منٹ پر ظاہر جعفر اور نور مقدم گھر سے نکل کر مین گیٹ پر آتے ہیں۔
گیٹ سے باہر گلی میں سامان والی ٹیکسی میں دونوں کو بیٹھ کر جاتے دیکھا گیا۔ رات 2 بجکر 52 منٹ پر ظاہر جعفر اور نور مقدم بیگ لے کر واپس گھر میں داخل ہوتے ہیں، اس موقع پر مین گیٹ پر چوکیدار افتخار گھر کے صحن میں نظر آتا ہے، جبکہ کالے رنگ کا کتا بھی موجود تھا۔
20 جولائی کی شام 7 بجکر 12 منٹ پر نور مقدم فرسٹ فلور سے چھلانگ لگا کر جنگلے پر گریں، ان کے ہاتھ میں موبائل فون بھی تھا، وہ لڑکھڑاتی ہوئی بیرونی مین گیٹ پر آئیں، نور مقدم باہر جانا چاہتی تھیں، لیکن چوکیدار افتخار اور مالی نے گیٹ بند کر دیا۔ اسی اثنا میں ظاہر جعفر گھر کے فرسٹ فلور کے ٹیرس سے چھلانگ لگا کر گراونڈ فلور پر آ گیا۔
ٹرانسکرپٹ کے مطابق مبینہ قاتل ظاہر جعفر نے دوڑ کر نور مقدم کو پکڑا اور اسے گیٹ پر بنی چوکیدار کی کیبن میں بند کرتا نظر آتا ہے، پھر ظاہرجعفر نور مقدم کا کیبن کھول کر موبائل فون چھین لیتا ہے۔ ظاہر جعفر نور کو کیبن سے نکال کر زبردستی گھسیٹ کر گھر میں لے جاتا ہے، 20 جولائی کو رات 8 بجکر 6 منٹ پرتھراپی ورکس کی ٹیم گھر کے گیٹ سے اندر آتی ہے۔
تھراپی ورکس کی ٹیم رات 8 بجکر 42 منٹ پر گھر میں داخل ہونے کی کوشش کرتی نظر آئی۔ رات 8بجکر 55 منٹ پر تھراپی ورکس ایک زخمی کو گھر سے باہر گیٹ کی طرف لے جاتی نظر آئی۔ کیس کی تفصیلات کے مطابق یہ زخمی تھراپی ورکس کا ہی ملازم تھا جسے ظاہر جعفر نے زخمی کر دیا تھا۔
