ڈمپر ایسوسی ایشن کے سربراہ کی بائیکاٹ کی دھمکی، کرن ناز کا سخت ردعمل

کراچی کے علاقے نارتھ کراچی پاور ہاؤس کے قریب ایک تیز رفتار ڈمپر نے موٹر سائیکل سوار کو ٹکر مار دی، جس کے بعد غصے میں بھرے ہوئے افراد نے کئی ڈمپر گاڑیوں کو آگ لگا دی۔ اس واقعے کے بعد سپر ہائی وے پر احتجاج کیا گیا، جس کی وجہ سے ٹریفک کا نظام درہم برہم ہوگیا۔

ڈمپر ایسوسی ایشن کے صدر لیاقت محسود نے دعویٰ کیا کہ ان کی 11 گاڑیاں نذرِ آتش کردی گئی ہیں اور انہوں نے اس اقدام کو دہشت گردی سے تعبیر کیا۔ میڈیا سے بات چیت کرتے ہوئے انہوں نے کہا، *"ہم پاکستانی ہیں اور قانون کے دائرے میں رہ کر کام کرنا چاہتے ہیں، لیکن اگر ہمارے ساتھ یہ سلوک جاری رہا تو ہمیں پاکستان سے بائیکاٹ کرنے پر مجبور ہونا پڑے گا۔"* انہوں نے مطالبہ کیا کہ گاڑیاں جلانے والوں کو فوری طور پر گرفتار کیا جائے اور سوال اٹھایا کہ اگر واقعی کوئی زخمی ہوا ہے تو اسے سامنے لایا جائے۔
https://twitter.com/x/status/1910088838678274233
تاہم، معروف صحافی کرن ناز نے لیاقت محسود کے بیانات پر سخت تنقید کرتے ہوئے کہا کہ *"جب ڈمپرز کی بے قابو رفتار سے کراچی کے بے گناہ شہری روزانہ موت کے منہ میں جاتے ہیں تو ڈمپر ایسوسی ایشن کے صدر کو کوئی تشویش نہیں ہوتی۔ لیکن جب ان کی 11 گاڑیاں جلتی ہیں تو وہ پاکستان کو بائیکاٹ کرنے کی دھمکیاں دینے لگتے ہیں۔"*

انہوں نے مزید کہا کہ *"اگر ابتدا ہی میں ڈمپر ڈرائیورز کے خلاف سخت کارروائی کی جاتی تو آج نہ حاملہ خواتین سڑکوں پر کچلی جاتیں، نہ کسی کے بیٹے کے جسم کے ٹکڑے ہوتے، اور نہ ہی آج ڈمپرز جلائے جاتے۔"*
https://twitter.com/x/status/1910147463945896332 معاملہ ابھی تک حل طلب ہے، اور عوامی سطح پر اس پر شدید ردعمل سامنے آرہا ہے۔ شہریوں کا مطالبہ ہے کہ ڈمپر ڈرائیورز کی بے احتیاطی پر سخت قوانین بنائے جائیں تاکہ ایسے المناک واقعات کا سلسلہ روکا جاسکے۔​