ہرنائی میں ایس ایس پی کی گاڑی پر مسلح افراد کی فائرنگ، گن مین زخمی

[News_Icon]

بلوچستان کے علاقے ہرنائی میں زیارت مین روڈ پر مانگی کے مقام پر نامعلوم مسلح افراد نے کوئلہ لانے والے تین ٹرکوں کو آگ لگا دی۔ یہ ٹرک ہرنائی کے علاقے شاہرگ کھوسٹ سے کوئلہ لے کر آرہے تھے۔

ڈپٹی کمشنر زیارت، لیاقت علی کاکڑ کے مطابق، حملے کے دوران مسلح افراد نے نہ صرف ٹرکوں کو آگ لگائی بلکہ شدید فائرنگ بھی کی۔ اسی دوران ایس پی ہرنائی کی گاڑی پر بھی فائرنگ کی گئی۔ اگرچہ ایس پی محفوظ رہے، مگر ان کا گن مین زخمی ہوگیا۔

پولیس نے اس واقعے کے بعد علاقے میں سرچ آپریشن شروع کر دیا ہے تاکہ حملے میں ملوث عناصر کو گرفتار کیا جا سکے۔ ہرنائی اور زیارت کے بعض علاقوں میں شر پسند عناصر اکثر مال بردار گاڑیوں کو نشانہ بناتے ہیں، جن کا مقصد علاقے میں خوف و ہراس پھیلانا ہوتا ہے۔

یاد رہے کہ بلوچستان میں غیر مقامی مزدوروں اور کارکنوں پر حملے میں بھی اضافہ ہوا ہے جس میں کئی افراد جان سے ہاتھ دھو بیٹھے ہیں۔ قانون نافذ کرنے والے ادارے بلوچستان میں دہشت گردوں اور شر پسند عناصر کے خلاف مسلسل کارروائیاں کر رہے ہیں تاکہ علاقے میں امن و امان بحال کیا جا سکے۔​

 

[carne]