مینگورہ، سوات اور خیبر ایجنسی کے بعد عمران خان، بشری بی بی، قیادت اور کارکنان کی رہائی اور مینڈیٹ کی واپسی کےلیے آج چارسدہ، کل بریکوٹ اور باجوڑ میں احتجاج ہوگا۔ ہفتہ کے روز ہمارے ایم این اے شاہد خٹک کی قیادت میں کرک میں احتجاج ہوگا۔ یوتھ ونگ اور مقامی قیادت صوبے کے دیگر اضلاع میں بھی احتجاجی شیڈول جاری کرچکی ہے۔ ہم اپنی تنظیموں، ٹیموں اور ذیلی ونگز کو متحرک کررہے ہیں۔ کور کمیٹی خان صاحب کی اجازت سے جب بھی لانگ مارچ، دھرنے یا احتجاجی تحریک کی فائنل کال جاری کرتی ہے، ہم تیار ملیں گے۔ میری وکلاء قیادت سے درخواست ہے کہ اب تو اعلی عدلیہ کے جج صاحبان اپنی زندگیاں داؤ پر لگا کر حقائق سامنے لے آئے ہیں۔ عمران خان، بشری بی بی اور تحریک انصاف کی قیادت کے خلاف فیصلے کس دباؤ کے تحت آئے، ۹ مئی کا گھناؤنہ منصوبہ کہ جس کو استعمال کرکے ملک کی سب سے بڑی سیاسی پارٹی پر ظلم و ستم کے پہاڑ توڑ دیے گئے، بے گناہ خواتین اور کارکنان کو کن کی ایما پر جیلوں میں رکھا گیا ہے قوم تو پہلے ہی جانتی تھی۔ اب اُس پر ملک کی اعلی عدالت کے جج صاحبان کی گواہی کی صورت مہر تصدیق بھی ثبت ہوگئی ہے۔ ہم میں سے بہت سے نوجوانوں کو سیاست میں شامل ہونے کی ترغیب عدلیہ بحالی تحریک سے ملی تھی، یہ وقت ہے کہ پارٹی اور سیاسی وابستگیوں سے بالاتر ہوکر آئین اور قانون کی بحالی کے لیے متحرک ہوں۔ میں آپ کو باور کراتا ہوں کہ آئ ایس ایف، تحریک انصاف یوتھ ونگ اور پاکستانی قوم آپ کے شانہ بشانہ کھڑی ہوگی۔ قدرت بار بار آپ کو موقع دے رہی ہے اگر کوئی یہ سمجھتا ہے کہ اُس کی خاموشی اُس کی بقا کی ضامن ہے تو یہ اُس کی خام خیالی ہے۔ جو عفریت اس ملک پر قابض ہے اُس کے منہ کو خون لگ چکا ہے، آج نہیں تو کل باری سب کی آئیگی۔ بلا تفریق آئے گی۔ خدارا اپنی وفاداریوں کا مرکز پاکستان کو رکھیں۔ ریاست کے نام پر پاکستان کی شہ رگ پر پنجے گاڑے بیٹھی عفریت کو نہیں۔
