ضمنی انتخابات کے دوران بھکر کے تھانہ کروڑ نے پی ٹی آئی کی مقامی قیادت پر ضلع میں داخل ہونے پر پابندی عائد کردی ہے۔
تفصیلات کے مطابق بھکر کے تھانہ کروڑ کے ایس ایچ او کی جانب سے جاری کردہ نوٹس میں کہا گیا ہے کہ ضمنی انتخابات کے دوران سابق رکن قومی اسمبلی عبدالمجید احمد خان نیازی اور ان کے بیٹے عبدالرحیم خان نیازی کے ضلع بھکر میں داخلے پر پابندی عائد کردی گئی ہے، خلاف ورزی کی صورت میں سخت سے سخت قانونی کارروائی کی جائے گی۔
نوٹیفکیشن منظر عام پر آنے کے بعد پی ٹی آئی رہنماؤں و کارکنان نے سوشل میڈیا پر سخت ردعمل کا اظہار کیا ہے، پی ٹی آئی کے مرکزی سیکرٹری جنرل حماد اظہر نے کہا کہ سنا ہے کہ ایسے نوٹس برطانوی راج میں نکلا کرتے تھے، آج کل فسطائیت میں ہم اس دور سے بھی آگے نکل گئے ہیں۔
صحافی محمد عمیر نے کہا کہ 21 اپریل کو ہونے والے ضمنی انتخابات سے پہلے ہی لاہور میں عدالتی اجازت کے باوجود پی ٹی آئی کے جلسے کی لائٹس بند کردی گئیں اور کارکنان کو گرفتار کرلیا گیا، قصور میں جلسہ کرنے پر مقدمہ ہوگیا، بھکر میں پی ٹی آئی کی لیڈرشپ کے ضلع میں داخلے پر پابندی لگ گئی۔
رہنما پی ٹی آئی ثناء اللہ مستی خیل نے کہا کہ کیا ضلع بھکر کو ایک رکن قومی اسمبلی اور اس کے بیٹے سے خطرہ ہے؟ کیا ریاست کا ایک ایم این اے اور قانون ساز دہشتگرد ہے؟ ایسی بھونڈی حرکتو ں سے پی ٹی آئی کا راستہ نہیں روکا جاسکتا، 21 اپریل کو شکست آپ کا مقدر ہوگی۔
ڈاکٹر منصور کلاسرا نے کہا کہ صورت حال یہ ہے کہ ایک ضلع سے دوسرے ضلع جانے پر بھی پابندی ہے، ہم نے یہ والی ترقی بھی کی ہے۔
حماد حیدر نے کہا کہ عمران خان کا مقابلہ کیا کریں گے یہ اس کے ایک کھلاڑی کا مقابلہ ہیں کرسکتے، پی پی 93 بھکر میں عمران خان کا امیدوار جس کا انتخابات نشان گھوڑا ہے وہی کامیاب ہوگا۔