وزیراعظم کے مشیر رانا ثناء اللہ نے کہا ہے کہ عمران خان اگر غیر مشروط طور پر گریٹر ڈائیلاگ کیلئے تیار ہیں تو مذاکرات ہوسکتے ہیں۔
تفصیلات کے مطابق رانا ثناء اللہ نے نجی ٹی وی چینل سے خصوصی گفتگو کرتے ہوئے کہا کہ عمران خان اور پی ٹی آئی ایک حقیقت ہیں، اسی طرح عمران خان کو بھی یہ تسلیم کرنا ہوگا کہ نواز شریف اور آصف زرداری بھی ایک حقیقت ہیں۔
انہوں نے کہا کہ گریٹر ڈائیلاگ وقت کی ضرورت ہے، اس کے علاوہ کوئی حل نہیں، نواز شریف تیار ہیں، عمران خان اور پی ٹی آئی ایک حقیقت ہیں، لیکن دوسروں کو بھی حقیقت مانیں، اداروں کو گریٹر ڈائیلاگ کا حصہ ہونا چاہیے۔
مذاکرات کے سوال کے جواب میں رانا ثناء اللہ کا کہنا تھا کہ مذاکرات سیاسی ہیں تو اس میں سیاسی جماعتیں شامل ہوں گی، اگر گریٹر ڈائیلاگ ہونا ہے تواس میں ادارے بھی شامل ہوں گے، بات تب ہی بنے گی جب ادارے شامل ہوں گے،تاہم مذاکرات جب بھی ہوں گے غیر مشروط ہوں گے۔
انہوں نے مزید کہا کہ آج عمران خان کہہ دیں کہ وہ غیر مشروط طور پر گریٹر ڈائیلاگ کیلئے تیار ہیں تو پھر ان سے مذاکرات ہوسکتے ہیں۔
عمران خان کی رہائی کے حوالے سے سوال کے جواب میں مشیر راناثناء اللہ کا کہنا تھا کہ اگر اتفاق رائے پیدا ہوجائے تو کوئی بھی عمل مشکل نہیں ہوتا۔
