سابق امریکی سفیر زلمے خلیل زاد نے سابق پاکستانی صدر آصف علی زرداری کی جانب سے 'ایجنٹ' کہنے کے ردعمل میں انہیں مسٹر 10 پرسنٹ کہہ ڈالا۔
تفصیلات کے مطابق مائیکروبلاگنگ ویب سائٹ پر سابق امریکی سفیر زلمے خلیل زاد نے آصف علی زرداری کا نام لیے بغیر ان کو جواب دیتے ہوئے کہا کہ "پاکستان کے مسٹر 10 پرسنٹ کو جواب دینا چاہتا ہوں کہ میں کسی بھی ملک یا شخص کیلئے لابی نہیں کرتا اور ناہی میں کسی کا ایجنٹ ہوں۔
انہوں نے مزید کہا کہ میں نے پاکستان کے تین مختلف بحرانوں کے بارے میں اپنی مخلصانہ تشویش کا اظہار کیاتھا جواب بدقسمتی سے شدت اختیار کر رہا ہے ، میں نے تجاویز دی تھیں کہ کیا کیا جانا چاہیے۔
زلمے خلیل زاد نے اپنی ٹویٹ میں دوسری بار آصف علی زرداری کو مسٹر 10 پرسنٹ قرار دیتے ہوئے کہا کہ "مسٹر ٹین پرسنٹ" کو اپنے ملک کو سب سے پہلے رکھنا چاہیے اور بی بی شہید کی میراث کا احترام کرنا چاہیے، تاکہ ایک ایسی تباہی کو روکا جا سکے جس سے 22 کروڑ لوگ متاثر ہوسکتے ہیں ۔
سابق امریکی سفیر نے کہا یہ 22 کروڑ لوگ ان (آصف علی زرداری) اور ان جیسے دوسرے لوگوں کی طرح کئی ممالک میں پوش گھروں کے مالک نہیں ہیں جہاں وہ بھاگ سکتے ہیں، پاکستانی اسٹیبلشمنٹ اور ملک کے سیاسی رہنماؤں کو قانون کی حکمرانی کا عہد کرنا چاہیے، سپریم کورٹ کو تقسیم کرنےکے بجائے اس کے فیصلوں پر عمل درآمد کرنا چاہیے۔
خیال رہے کہ سابق صدر مملکت آصف علی زرداری نے گزشتہ روز ایک انٹرویو کے دوران زلمے خلیل زاد سے متعلق سوال کے جواب میں کہا تھا کہ "زلمے خلیل زاد ایک ایجنٹ ہیں جنہیں کچھ لوگوں نے لابی کیلئے رکھا ہوا ہے"۔
- Featured Thumbs
- https://www.siasat.pk/data/files/s3/15zalmykhalailvszardari.jpg
