عمران خان بارے بھی زعم تھا کہ وہ انقلابی ہو گئے ہیں لیکن یہاں کوئی انقلابی نہیں ہے: قمر زمان کائرہ
سینئر صحافی وتجزیہ کار اطہر کاظمی نے نجی ٹی وی چینل سما نیوز کے پروگرام میرے سوال میں گفتگو کرتے ہوئے کہا کہ اس میں کوئی دو رائے نہیں ہے کہ یہاں پر سیاستدانوں پر تنقید کرنا بہت آسان ہے۔
سیاستدانوں کی کچھ حدود ہیں جس میں رہ کر وہ کام کر رہے ہوتے ہیں، کوئی سیاستدان اپنی حدود سے باہر نکل کر کھیلے اور پورا سٹیڈیم تالیاں بجائے اس کے بعد وہ پھر بھاگ کر پھر سے انہی حدود میں چلا جائے تو لوگوں کو بہت مایوسی ہوتی ہے۔
اطہر کاظمی نے کہا کہ اس میں کسی ایک سیاستدان کا نام نہیں لیا جا سکتا، یہاں جب کوئی اقتدار میں ہوتا ہے تو اسے سب چیزیں اچھی لگتی ہیں، اقتدار جاتا ہے تو کہتے ہیں کہ مجھے اس طرف سے کہا جاتا تھا کہ فلاں کے خلاف نیب کا ریفرنس بنا دو یا ہمیں پتا ہی نہیں کہ رانا ثناء اللہ پر ہیروئن کس نے ڈالی؟ حنیف عباسی کو اے این ایف کی کورٹ رات 12 بجے کھلی اور ان کو سزا سنائی گئی۔
انہوں نے کہا کہ یہاں مظلوم کوئی ایک نہیں ہوتا لیکن سکرپٹ ایک ہی چل رہا ہوتا ہے کہ جیسے کسی پر بکری یا بھینس چوری کا مقدمہ 50 سال پہلے ہوتا تھا اب بھی ہو رہا ہے۔ سینئر رہنما پاکستان پیپلزپارٹی قمر زمان کائرہ نے اس سوال پر کہ کیا عمران خان کی سیاسی غلطی نوازشریف سے بڑی ہے؟کا جواب دیتے ہوئے کہا کہ ماضی میں دیکھا جائے تو پیپلزپارٹی پر کون سا جبر نہیں ہوا؟
انہوں نے کہا کہ ن لیگ امیدواروں نے تو الیکشن میں صرف ٹکٹ واپس کیے لیکن ہمارے ساتھ تو یہ بھی ہوا کے ہمارے جیتے ہوئے امیدوار بھی چھین لیے گئے، ماضی انتہائی تلخ ہے۔ پاکستان میں سماجی ارتقاء کی تحریک بہت آہستہ رہی ہے لیکن یہ بات درست ہے کہ پاکستان کے معروضی حالات کی وجہ سے سیاسی عمل مستحکم نہیں ہو سکا۔
انہوں نے کہا کہ ہماری عوام ، انفرادی شخصیات اور اداروں کے رویوں میں بھی جمہوریت شامل نہیں تھی جسے ہم نے لانا تھا لیکن نہیں لا سکے۔ کچھ لوگوں کا خیال ہے کہ ہماری لیڈرشپ انقلابی ہو گئی ہےایسے ہی عمران خان بارے بھی زعم تھا کہ وہ انقلابی ہو گئے۔ یہاں کوئی انقلابی نہیں ہے۔
انقلاب لانے کے صرف دو طریقے ہیں کہ نیچے سے کوئی تحریک اٹھے اور اسے کوئی رہنما مل جائے یا کوئی رہنما قوم کو ایک خواب دکھا کر خواب کی تعبیر کے لیے انقلاب کی راہ تعمیر کرتا ہے، یہاں ایسا کوئی نہیں ہے۔ ہماری سب سے خوفناک حقیقت یہ ہے کہ جس ہائیبرڈ نظام کی بات کی جا رہی ہے کیا وہ آج پورے زور سے ناچ نہیں رہا؟
- Featured Thumbs
- https://www.siasat.pk/data/files/s3/14inqlalaknsbddidj.png
