battery low
Chief Minister (5k+ posts)
وزیر اعلیٰ پنجاب مریم نواز نے میو اسپتال کا دورہ کیا، جہاں مریضوں اور ان کے لواحقین نے اسپتال کی انتظامیہ کے خلاف شکایات کے انبار لگا دیے۔ اس پر انہوں نے حکام پر شدید برہمی کا اظہار کیا اور میو اسپتال انتظامیہ کی سخت سرزنش کی۔ مریم نواز نے میڈیکل سپرنٹنڈنٹ (ایم ایس) میو اسپتال کو عہدے سے ہٹانے کا حکم دے دیا۔
رپورٹ کے مطابق اس موقع پر مریم نواز نے کہا کہ "مخلوق رل رہی ہے، کوئی پوچھنے والا نہیں، کیا اللہ کو جواب نہیں دینا؟ میو اسپتال کے حالات بہت برے ہیں، لوگ اسپتال میں علاج کی توقع اور امید لے کر آتے ہیں۔"
وزیر اعلیٰ پنجاب نے کہا کہ "کس وارڈ میں کیا ہو رہا ہے، اسپتال انتظامیہ کو علم ہی نہیں۔ جو عوام کے ساتھ ہو رہا ہے، ذمہ داروں کے اپنے ساتھ ہو تو پتا چلے، کسی کی بدانتظامی کی سزا عوام کو کیوں ملے؟"
انہوں نے مزید کہا کہ میو اسپتال میں زیر علاج مریضوں اور ان کے لواحقین نے سرنج، برنولا وغیرہ نہ ملنے کی شکایت کی۔ کارڈیالوجی وارڈ میں کیڑے مکوڑے پائے جانے کی شکایت پر وزیر اعلیٰ مریم نواز نے مزید برہمی کا اظہار کیا۔
وزیر اعلیٰ مریم نواز نے رک کر انتظار گاہ اور راستے میں کھڑے مریضوں اور لواحقین کی شکایات سنیں۔ ایک معصوم بچی نے کہا کہ "ماں بیمار ہے، رات بھر دوائیوں کے لیے بھاگ بھاگ کر تھک گئی ہوں۔" اس کی بات سن کر وزیر اعلیٰ مریم نواز نے شدید ناراضی کا اظہار کیا اور دورے کے دوران ہی میو اسپتال میں ہنگامی اجلاس طلب کر لیا۔
انہوں نے میو اسپتال کے امور کی تفصیلی انکوائری کرنے کی ہدایت کی اور تمام ذمہ داروں سے جواب طلب کیا۔ انہوں نے میڈیسن کے واجبات کی ادائیگی کے لیے فوری اقدامات کا حکم دیا اور اسپتال میں ادویات کی 100 فیصد فراہمی یقینی بنانے کی ہدایت کی۔
وزیر اعلیٰ پنجاب نے سیکرٹری ہیلتھ کو ذمہ داروں کی تعیناتی کر کے کارروائی کرنے کی ہدایت کی اور اسپتال کی تعمیر و مرمت کے لیے جامع پلان طلب کر لیا۔
مریم نواز نے اسٹور میں ادویات، سرنج، برنولا اور دیگر اشیاء کی فراہمی چیک کی اور میو اسپتال ایمرجنسی بلاک، ٹی بی اینڈ چیسٹ، آئی سی یو، کارڈیالوجی اور دیگر وارڈز کا جائزہ لیا۔
وزیر اعلیٰ مریم نواز شریف نے وارڈز میں زیر علاج مریضوں کی عیادت کی اور ان کی جلد صحت یابی کی دعائیں دیں۔ وزیر اعلیٰ مریم نواز شریف جگہ جگہ رک کر لوگوں کی شکایات اور مسائل سنتی رہیں، انہوں نے سندھ سے آئے میاں بیوی کی شکایت سن کر فوری ازالہ کی ہدایت کی اور گوجرانوالہ سے علاج کے لیے آنے والی خاتون کو گلے لگا کر تسلی دی۔
دورے کے دوران انہوں نے زیر علاج مریضوں اور تیمارداروں سے علاج کے بارے میں مکمل تفصیلات دریافت کیں، وارڈز میں مریضوں کے علاج کے عمل کا مشاہدہ کیا، مختلف وارڈز میں صفائی کی صورتحال کا بھی جائزہ لیا اور گردے کے مرض میں مبتلا بچی کی ماں کی اپیل پر فوری ٹرانسپلانٹ کے لیے اقدامات کی ہدایت کی۔
Last edited by a moderator:
