نیوزی لینڈ نے پاکستان کو 73 رنز سے شکست دے کر تین میچز پر مشتمل ون ڈے سیریز کے پہلے میچ میں کامیابی حاصل کی۔
نیوزی لینڈ نے پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 344 رنز بنائے۔ مارک چیپمین 132 رنز اور ڈیرل مچل 76 رنز کے ساتھ نمایاں بیٹسمین رہے۔
یہ میچ نیپیئر میں کھیلا گیا جہاں پاکستان کے کپتان محمد رضوان نے ٹاس جیت کر نیوزی لینڈ کو بیٹنگ کی دعوت دی۔
پاکستان کی اننگز:نیوزی لینڈ کے 345 رنز کے ہدف کے تعاقب میں پاکستان کی اوپننگ پارٹنرشپ زیادہ کامیاب نہ رہی۔ اوپنرز عبد اللہ شفیق اور عثمان خان نے 39 اور 36 رنز بنائے اور دونوں کیویز بولرز کا شکار ہو گئے۔ اس کے بعد کپتان محمد رضوان بھی 30 رنز پر آؤٹ ہو گئے۔
پاکستان کی 3 وکٹیں گرنے کے بعد بابر اعظم نے ذمہ دارانہ بیٹنگ کی اور 83 گیندوں پر 78 رنز بنائے، مگر وہ بھی آؤٹ ہو گئے۔ بابر کے بعد قومی ٹیم کی وکٹیں تیزی سے گرنے لگیں، طیب طاہر 1، عرفان خان صفر، نسیم شاہ صفر، حارث رؤف 1، عاکف جاوید 1 اور محمد علی بھی صفر پر آؤٹ ہوئے، اور یوں پوری ٹیم 44 اوورز اور ایک گیند پر 271 رنز بنا کر آؤٹ ہو گئی۔
نیوزی لینڈ کی اننگز:پاکستان کے خلاف پہلے ون ڈے میں نیوزی لینڈ کی ابتدائی 3 وکٹیں 50 رنز پر گر گئیں، ول ینگ 1، نک کیلی 15 اور ہینری نکلز 11 رنز بنا کر آؤٹ ہوئے۔ اس کے بعد ڈیرل مچل اور مارک چیپمین نے 199 رنز کی شراکت داری قائم کی۔ چیپمین نے 132 رنز کی شاندار اننگز کھیلی، جس میں 13 چوکے اور 6 چھکے شامل تھے، جبکہ مچل 76 رنز بنا کر آؤٹ ہوئے۔
محمد عباس نے ڈیبیو پر 26 گیندوں پر 52 رنز بنائے، جس میں 3 چھکے اور 3 چوکے شامل تھے۔ نیوزی لینڈ نے 344 رنز کا اسکور کیا۔
پاکستان کی جانب سے عرفان خان نے 3 وکٹیں حاصل کیں، جبکہ حارث رؤف اور عاکف جاوید نے 2، 2 وکٹیں حاصل کیں۔ نسیم شاہ اور محمد علی نے ایک، ایک کھلاڑی کو آؤٹ کیا۔
یاد رہے کہ اس میچ میں پاکستان کے عاکف جاوید، محمد علی اور عثمان خان نے ڈیبیو کیا تھا۔ اس سے پہلے نیوزی لینڈ نے پاکستان کو 5 میچز کی ٹی ٹوئنٹی سیریز میں 1-4 سے شکست دی تھی۔
Last edited:
chairman plus interior minister too. 
