ماضی کے مشہور مزاحیہ پروگرام ففٹی ففٹی کے اداکار ماجد جہانگیر جو ان دنوں شدید بیمار ہیں انہوں نے معروف ٹی وی اینکر اقرارالحسن اور وسیم بادامی پر الزام عائد کیا ہے کہ ان دونوں نے ان کے نام پر کی گئی فنڈ ریزنگ ٹیلی تھون میں جمع ہونے والی 10 لاکھ روپے کی رقم ہڑپ کر لی ہے۔
تفصیلات کے مطابق جہاں ایک طرف شوبز کی چمک دھمک آنکھوں کو خیرہ کرتی ہے تو دوسری طرح اس کا ایک بھیانک چہرہ یہ بھی ہے کہ سکرین سے پیچھے ہٹنے کے بعد ان ستاروں کا کوئی پُرسان حال نہیں ہوتا۔ کامیڈین ماجد جہانگیر نے سرکاری ٹی وی کا سنہری دور دیکھا اور اس دوران ان کا ففٹی ففٹی پروگرام بےحد مقبول رہا۔
ماجد جہانگیر گزشتہ چند برسوں سے شدید علیل ہیں، ان کے پاس رقم کی کمی کے باعث وہ علاج معالجے سے بھی قاصر ہیں تبھی انہیں نجی چینل اے آر وائی ڈیجیٹل پر مدعو کیا گیا اس فنڈ ریزنگ ٹیلی تھون میں 10 لاکھ روپے کی رقم اداکار کے علاج کیلئے جمع ہوئی جبکہ اینکر وسیم بادامی نے یہاں تک دعویٰ کیا کہ وہ اداکار کوایک نئی گاڑی بھی عطیہ میں دیں گے تاکہ وہ اسپتال تک باآسانی جا سکیں۔
تاہم اب ماجد جہانگیر کا کہنا ہے کہ انہیں نہ تو وہ گاڑی دی گئی اور نہ ہی ان کے علاج کے نام پر جمع ہونے والی رقم ملی ہے۔ اداکار نے کہا اس پروگرام کے دوران اقرار الحسن اور وسیم بادامی ایسے میرے پیروں میں بیٹھ گئے جیسے میں کوئی بہت بڑی شخصیت ہوں اور کہا کہ اسٹوڈیو میں کھڑی یہ نئی ٹویوٹا کورولا اب آپ کی ہے مگر دھوکا کیا گیا کچھ نہیں ملا۔
ماجد جہانگیر نے کہا کہ میرا ان کیلئے یہ پیغام ہے کہ یاد رکھنا میں تمہیں اگلے جہاں جا کر پکڑ لوں گا۔ انہوں نے بتایا کہ ان کے خلاف میں پریس کلب جا کر بھی احتجاج کرتا رہا ہوں مگر کسی نے میری بات نہیں سنی۔
