پنجاب اسمبلی میں ن لیگ کو شکست کا سامنا کرنے کےبعد ٹویٹر پر عطاء تارڑ اور رانا ثناء اللہ سے استعفیٰ لینے کا مطالبہ سامنے آیا ہے، عطاء تارڑ اور حناپرویز بٹ نے اس مطالبے پر ردعمل دیدیا ہے۔
تفصیلات کے مطابق پنجاب اسمبلی میں وزیراعلی چوہدری پرویز الہیٰ کے اعتماد کا ووٹ لینے کے موقع پر ن لیگ کی جانب سے وفاقی وزیر داخلہ رانا ثناء اللہ اور وزیراعظم کے معاون خصوصی عطاء تارڑ کو اہم ذمہ داری سونپی گئی تھی، تاہم ن لیگ کو اپنے دعوؤں کے برعکس پنجاب اسمبلی میں شکست کا سامنا کرنا پڑا۔
مائیکروبلاگنگ ویب سائٹ ٹویٹر دنیا نیوزسےمنسلک صحافی اظہر جاوید نے ایک ٹویٹ میں کہا کہ عبرت ناک شکست کے بعد رانا ثناء اللہ اور عطاء تارڑ کو ذمہ داری قبول کرتے ہوئے مستعفیٰ ہوجانا چاہیے، اگر یہ خود مستعفیٰ نہیں ہوتے تو ان سے استعفیٰ لیا جانا چاہیے کیونکہ دونوں بری طرح ناکام ہوگئے ہیں۔
وزیراعظم شہباز شریف کے معاون خصوصی عطاء اللہ تارڑ نے اس ٹویٹ پر ردعمل دیتے ہوئے کہا کہ قیادت آدھے منہ سے کہے ہم حاضر ہیں، استعفیٰ تو بہت چھوٹی چیز ہے۔
انہوں نے مزید کہا کہ مشکل وقت میں جب تمام ضمنی انتخابات میں میدان میں کھڑے ہو کر حالات کا مقابلہ کرتے تھے ہم یا قانونی جنگ لڑتے تھے تب تو کسی چیز کی پرواہ نہیں کی تو کیا ڈرنا۔
مسلم لیگ ن کی رہنما اور سابق رکن پنجاب اسمبلی حنا پرویز بٹ نے بھی اظہر جاوید کےمطالبے پر ردعمل دیتے ہوئے کہا کہ رانا ثنا اور عطا تارڑ دونوں پارٹی کا قیمتی اثاثہ ہیں۔ان کی جماعت کیلئے خدمات کسی سے ڈھکی چھپی نہیں ہیں۔۔پوری مسلم لیگ ن کو ان پر 100 فیصد اعتماد ہے۔
- Featured Thumbs
- https://www.siasat.pk/data/files/s3/ranash1h11.jpg
