ورلڈ کپ میں آسٹریلیا کے ہاتھوں افغانستان کو شکست کے بعد سوشل میڈیا صارفین نے عرفان پٹھان پر طنزیہ وار شروع کردیئے ہیں۔
تفصیلات کے مطابق گزشتہ روز آسٹریلیا نے افغانستان کو سنسنی خیز میچ کے بعد شکست دیدی، میچ میں ایک موقع پر 291 رنز کے تعاقب پرآسٹریلیا کی 91 رنز پر 7 وکٹیں گرچکی تھیں جس پر افغان شائقین سمیت بھارتی مینٹور اجے جڈییجا کو ڈانس کرتے دیکھا گیا، تاہم گلین میکسویل نے 201 رنز کی ناقابل شکست کھیل کر افغانستان کی خوشیوں کو غم میں بدل دیا اور ہارا ہوا میچ جیت لیا۔
اس میچ میں افغانستان کی شکست کے بعد سوشل میڈیا صارفین نے افغانستان کے ہاتھوں پاکستان اور سری لنکا کوشکست پر بھنگڑے ڈالنے والے عرفان پٹھان کو یاد کیا اور ان پر طنزیہ وار کیے۔
سوشل میڈیا صارفین نے میچ کے بعد سابق بھارتی باؤلر عرفان پٹھان کا اتنا ذکر کیا کہ وہ ٹویٹر پر ٹرینڈ کرنے لگے، افغانستان کی گزشتہ فتوحات پر بھنگڑے ڈالنے والے عرفان پٹھان سے صارفین نے اس شکست کے بعد بھی بھنگڑوں کا مطالبہ کیا۔
صارفین نے بھارتی فلموں کے سین ڈھونڈ ڈھونڈ کر عرفان پٹھان پر طنز کیے ، کسی عرفان پٹھان کو بوری پہن کر چھپتے ہوئے دکھایا تو کسی نے عرفان پٹھان کو ملنے والے صدمے کی عکاسی کی، کسی نے عرفان پٹھان سے "مجرا کینسل ہونے پر استفسار کیا" تو کسی نے انہیں بیگانی شادی میں دیوانا عبداللہ قرار دیدیا ۔
ایک صارف نے روتے ہوئے بچے کے ڈانس کی ویڈیو شیئر کی اور اسے عرفان پٹھان کا 'ڈانس قرار دیا'۔
خیال رہے کہ گزشتہ روز آسٹریلیا سے شکست سے دوچار ہونے کے بعد افغانستان کی آئی سی سی ورلڈ کپ کے سیمی فائنل تک رسائی بھی مشکل ہوگئی ہے، اب انہیں اپنے آخری میچ میں جنوبی افریقہ کو شکست دینے کے بعد بھی دیگر ٹیموں کی ہار اور جیت پر تکیہ کرنا ہوگا۔