پڑوسی برادر ملک چین نے بھی پاکستان میں سیاسی عدم استحکام پر تشویش کا اظہار کردیا ہے۔
تفصیلات کے مطابق چینی وزیر خارجہ چن گانگ اسلام آباد میں جاری چوتھے پاک چین اسٹریٹجک مذاکرات میں شرکت کیلئے دفتر خارجہ پہنچے، اس موقع پر وفاقی وزیر خارجہ بلاول بھٹو زرداری نے ان کا استقبال کیا ۔
دونوں ملکوں کے وزرائے خارجہ کے درمیان مذاکرات کے بعد مشترکہ پریس کانفرنس کی گئی جس میں چینی وزیر خارجہ چن گانگ نے پاکستان میں جاری سیاسی عدم استحکام پر تشویش کا اظہار کیا۔
چینی وزیر خارجہ کا کہنا تھا کہ چین یہ امید کرتا ہے کہ پاکستان میں تمام سیاسی قوتیں آپس میں بیٹھ کر سیاسی استحکام کے قیام کیلئے کوششیں کریں گی تاکہ پاکستان معاشی اور داخلی سطح پر چین کے ساتھ آگے بڑھ سکے۔
انٹرنیشنل ریلشنز کے ماہر اور صحافی انس ملک نے چینی وزیر خارجہ کے اس بیان پر ردعمل دیتے ہوئے کہا ہے کہ میرے خیال میں موجودہ حکومت چین کی جانب سے پاکستان کو معاشی ترقی کیلئے سیاسی استحکام لانے کی ترغیب دینے سے متعلق بیان کو اچھے انداز میں نہیں دیکھےگی۔
انہوں نے مزید کہا کہ کم از کم موجودہ حکومت کیلئے یہ ایک عجیب صورتحال ہوگی۔
پاکستان تحریک انصاف کے رہنما ڈاکٹر افتخار درانی نے بھی چینی وزیر خارجہ کے بیان پر ردعمل دیتے ہوئے کہا کہ چینی وزیر خارجہ کا پاکستان میں سیاسی استحکام کی خواہش کا اظہار کرنا اس بات کا ثبوت ہے کہ عالمی دنیا بھی جانتی ہے کہ امپورٹڈ حکومت ملک پر غیر منتخب طریقوں سے مسلط ہے اور ایسی حکومت کے ساتھ خارجہ پالیسی بنائی نہیں جا سکتی۔
